گوانک جنت گلزمین
دلگوش: اے جمال جمعہءِ گوما یک گُلگدارے کہ پلستینی زمینءِ ارزشت، گہگیری،زورگیر ءِ ھلاپءَ جنگءُ یکمشتی ءِ سرءَ اِنت۔
چاندنی دیسائی: جمال، پہ من اے یک شْرپے کہ گوں تو گپ ءُ تران بوگءَ انت۔تو مارا پلستین ءِ ھستیں زمینی جاورالانی بارو ءَ چہ بندات ءَ سرپدی دات کن ئے؟
جمال: ھئو، الّم۔ اے وھد ءَ جاور سک نگیگ اَنت،ھاس لس مہلوک ءُ پلستینی واکدارانی میان ءَ، پرچہ کہ اسرائیل ءِ نیمگ ءَورناھانی جُنز (Youth Movement) ءِ رھشون بسیل ال ارَج (Basil Al-Araj) جَنَگ بیتگ۔ بسیل ماں رملّہ ءَ6 مارچ 2017 ءَ اسرائیل ءِ (لشکرءِ) چھاپہ یے ءِ میان ءَ جَنَگ بیت۔آئی کوش ءَ رند، آئی ءِ جون آمدگسءَ برَگ بیت ءُ آئیءِ سرءَ بہتام جنگ بیت کہ آئی ءَ بے کاگدیں سلاہ گون بوتگ۔ تو ھیال کُت کن ئے؟ اے یک ھشکیں گوچلی یے۔گڑا ورناء آمدگس ءِ دیمءَ جاک ءُ کوکار ءَ اَنت کہ ، ''دیمءَ سْیاہ کن اِت"،"پوک اِت شما۔" واکدار ایشاں لٹ ءُ کُٹ ءِ زبان ءَ پسّو دئینت۔ آ ایشاں بے وڑءَ جن انت،جنکاں لٹ دئینت ءُ بسیل ءِ پِت ءَ داں نہ بکش اَنت، ھمد ءَ آ وتی ھد ءَ سرگوز کن اَنت۔ بسیل ءِ پت ءِ سرءَ اُرش کنَگ ءُ لٹ ءُ کُٹ کنگ ءِ سبب ءَ مئے مہلوک سک زہر اِنت۔ اے جھد ءِ تھا ھچبر یک شھیدے ءِ پت مئے وتی مردمانی دست ءَ لٹ ءُ کُٹ کنگ نہ بیتگ۔ پولیس ءَ بگر داں مئے ملکی سرکماش (سدر) ءَ بہ رو، مئے درستیں واکدار(اسرئیل ءِ) کمکار اَنت۔ ھستیں وھد ءَ واکدارانی ھلاپ ءَ زھرشانیانی سبب ءَ جاور سک نگیگ اَنت۔ اے یک ٹوہیں کلوہ یے پہ واکداراں کہ آہانی(سکیورٹی ءِ پڑ ءَ) اسرائیل ءَ گوں ھمنستی ایر جنگ بوگ ءَ اِنت۔
جُست: Stop the Wall Campaign in Palestine"" ءِ ذمہ وار ءِ بستار ءَ تو پلستین ءِزمین ءِ سر ءَ زایونسٹ پروجکٹ انکروچمنٹ ءِ کسھانی یکجاہ کنگ ءُ آھاں شِنگ کنگ ءَ کُمک کن ئے، ھاس بے قانودی آباتی (Illegal Settlements) ءُ "Apartheid Wall " ءِ جوڑ کنگ ءِ درگت ءَ۔ تو مدام پلستین ءِ تہءَ ابو ندال ءِ گہگیری ءِ کسھاں چو ساچشتی(یا کہ موجریں) دابےءَ شنگ ءُ تالان کن ئے۔ تو سرپدی دات کن ئے کہ آئی ءِ زمین چی پیم پُلگ بیتگ ءُ آئی ءِ جہد ءُ گہگیری ءِ گوں زمین ءَ چے پیمیں سیادی یے است؟
جمال: تو پلستین ءِ بندپتر ءَ چہ ابو نِدال ءِ کسہ ءَ ونت کن ئے۔ لڑ ءُ بار ءِ راج دپتر، (اسرائیلءِ) شاھگانی، سنگینی، جھد ءُ پاداری؛ اے درست گوں زمین ءَ بندوک اَنت۔ اے درست مارا یکجاہ گندگ کاینت۔ اے کہ ھما دروراں دیم ءَ کار ایت تہ اے ڈولیں بامردیں گہگیری ءِ کنَگ یک ٹاہ یے زانگ بیت۔ اے مرد، کہ 1948 ءَ داں کاپِر قاسم ءَ گرین لائن ءَ چہ کمو ہما دیم جاھمنند بوتگ۔ اے گوں سرجمیں کہول ءَ 1948 ءَ گلّینگ بوتگ۔ آ وھد ءَ اے یک کسانیں بچکے بوتگ، سک کسان بوتگ، اے وھد ءَ آئی ءِ پت ءُ پیرک دیم پہ کوہاں تاچینگ بوتگ اَنت ۔ہمے وھد ءَ آئیءِ پیرک جَنگ بیت ءُ آئی ءِ کہول ءِ آ دگہ مردم داں دو ماہ ءَ ہمے کوھاں درچکانی چیر ءَ دوار کن اَنت؛ پہ ورگ ءَ ھچ نہ بیت تہ کاہ ءُ بوٹگاں گوں گزران کن انت۔ 1967 ءَ نوں آ انچیں کوچگے ءَ سر بنت کہ اودا آہاں زمین بیت۔
وھدے ابو ندال ءِ کہول اودءَ سر بوت تہ وتءَ را باھوٹی اش جوڑ کُت ۔ 1967ءَ آھاں وتی زندگ دارگ ءِ ھاتر ءَ کشت ءُ کشاری بنا کُت۔ منی ھیالءَ آئیءِ پِت مھلہ بیران بیت گڑا کہول ءِ ھیال دارگ پہ ابو ندال ءَ یک نوکیں جنجالے بیت؛ پمیشکہ، آ وتی ورنائی ءِ وھداں پلستین ءَ پہ پانزدہ سالءَ یلہ دنت ءُ پہ کار ءَ در کپ ایت۔ وھدے آ واتر بیت، وتی کوچگ ءَ رَوت ءُ ہرچ زرے کہ مُچ ئِے کُتگ درستاں ہمے کوچگ ءَ ھرچ کنت کہ تنی وھدی ھمدءَ جاہ مَنْند اَنت۔ آئی لوگ سلپی ءُ کلکلیا ءِ شاہدگ ءِ سرءَ بنت ءُ لوگءِ ھسار ءَ یک آباتی یے بیت، بزاں آئیءِ لوگ آباتی ءِ تہءَ اِنت۔ رندءَ زایونسٹ ہمے ھندءِ ایردستیءَ بندات کن اَنت ءُ روچ پہ روچ اے آباتی آئی لوگ ءِ نزیکترءَ آیان بنت۔آ درستاں ساری اودءَ نرسریءِ بُنھشت ءَ ایر کنت ءُ آتراپ ءَ نہال بہا کنت۔ اسرائیلی لشکر اناگہ ءَ کیت ءُ شَور کنت کہ اے نرسری جْوانیں جاھے ءَ نہ اِنت، گڑا آئی ءِ نرسری شگالی کنگ بیت پرچہ کہ آئی ءِ لوگ کوچگ ءِ ھما گُڈی لوگ بیت کہ اود ءَ یک یہودی آباتی یے پہ آبات بوگ ءَ آھگ ءَ بیت۔ گڑا نرسری کہ شگالی کنگ بیت تہ آ یک کسانکیں دکانے پچ کنت، چاہ ءُ کافی بہا کنگ بنا کنت، آئی ءِ اے دکان اوں پروشگ بیت۔آئی ءَ جہد کُت کہ وتی لوگءُ دکان ءِ میان ءَ رو ءُآ بہ کنت، بلئے ھمے میان ءَ "Apartheid Wall"جوڑ کنگ بیت ( کہ مرد ءِ زند ءُ لاپ ءِ دِلگ ءَ ٹِل کنگ بیت)۔اسرائیلیاں مرد ءِ چاہءِ دکان پرشت ءُ نوں لوٹ اِت کہ آئی ءِ لوگ ھم پروشگ بہ بیت۔
بلئے، ابو ندال ءَ جنگ کُت۔اے ہما وھد اَت، کہ ما (دیوال ءِ مِک کنگ ءِ ھلاپ ءَ ) اےجُنز ءَ بندات کنگ ءَ اِت اِنت۔گڑا ما اود ءَ روَگ بنا کُت، داں (جنگ ءِ) بھر بہ بئیں ءُ آئی ءِ ھمراہداری ءَ بہ کن ایں۔ آئی ءِ دوزواھاں اود ءَ یک تمبویے ھم جتگ اَت۔ چہ لشکر ءِ ، چیریں ادارگانی ءُ آباتکارانی نیمگ ءَ ابو ندال ءِ لوگ ءِ سرءَ اُرش کنگ بیت تہ آ یک ٹوہیں زورے ءِ چیر ءَ بئیت۔ چوشکہ ابو ندال ءِ لوگ ءِ سر ءَ لشکر، چیریں ادارہ ءُ دری مردماں اُرش کُتگ اَت، پمیشکہ آئی جاور سک نگیگ اِت اَنت۔ یک دگہ جیڑھے ایش اَت کہ ابو ندال ءِ لوگ چہ دری مردمانی آباتیاں دہ گز دور اَت؛ ھمے سبب اَت کہ آئی زند ماں کورچات ءَ کپتگ اَت ءُ آئی ءِ کہول تُرس ءِ آماچ اَت۔ ھمے وھد ءَ کہ اپارتھیڈ وال جوڑ کنگ بوگ ءَ اَت، تہ اسرائیل ھمے جھد کنت کہ ندال ءِ لوگ ءِ یک بھرے سرجم ءَ بُہ پروشیت ءُ اے دیوال ءَ آئی ءِ در ءِ دیم ءَ یک گزّے ءِ دوری ءَ جوڑ بہ کنت۔ ھمے سبب ءَ نوکیں جنگے بندات بیت؛ ندال دیوال ءَ بیست گز ءَ دور برگ ءَ سوبمند بیت، بلئے اسرائیل جھد کنت کہ ندال ءِ راہ سرجم ءَ بند کنگ بہ بیت۔
وھدے لشکر لوگ ءِ بلڈوز کنگ ءَ کئیت تہ ابو ندال زمین ءِ سرءَ چپی دیم وپسوک بیت ءُ کندگ ءَ بیت۔لشکر ءِ اَپسر آئی ءَ چاران ءَ جُست کنت،"تو گنوک ئے؟"
ابو ندال درّائینت،" اناں! من گنوک نیاں،بلئے تو دپ ءَ بند کن پرچہ کہ زمین گوں من گپ ءَ اِنت۔"
لشکر ءِ اپسر پدا جُست کنت، " زمین گوں تو گپ ءَ اِنت؟"
ابو ندال پسہ دنت،" ھؤ، زمین گوں من گپ ءَ اِنت۔ بلئے تئی وڑیں مردمے بھہ اے زمین ءِ زبان ءَ سرپد بوت نہ کنت، پرچہ کہ اے تئی زمین نہ اِنت۔"
"زمین ءَ ترا چے گْوَشت؟" لشکر ءِ اپسر ءَ پول کُت۔
ابو ندال پسہ دات،"اے زمین منءَ کندان ءَ گُشگ ءَ اِنت کہ رنجاں مہ بو۔ ھمنکدر کہ من گوں ایشی ءَ ھمراہداری کناں، اے ھم گوں من ھمراہدارہ کنت، من ءَ یل نہ کنت۔ بلّے کہ آ(زورگیر) کاینت، آھاں واتر روگی اِنت۔ اے زمین آھانی نہ اِنت۔"
لشکر ءِ اپسر کمو برانز گیپت ءُ پول کنت، "پہ اے لوگ ءَ ترا چنکس لوٹیت،اے زمینءِ کیمت چی اِنت؟ یک سد ھزار بیت؟ پنجاہ ھزار؟ ما اگاں ترا دہ لک بہ دے ایں چون انت؟ اگاں ترا چیکے بہ دے ایں ءُ ترا رزا بہ بیت کہ ہرچ لمبرے نبشتہ کنگ لوٹ ئے ترا رسیت، چون انت؟"
ابو ندال درّائینیت، " بچار، تو اگاں سرجمیں دگنیا ءِ زراں بْیار ئے ادءَ مُچ بہ کن ئے ، پدا ھم ترا اے زمین نہ رسیت۔"
ابو ندال وتی جہد ءَ سوب مَنْد بوت۔ زایونسٹ آئی ءِ لوگ ءِ پروشگ ءَ بے سوب بوتگ اِت اَنت ءُ نوں دیوال ءَ ھم پشت ءَ کنزینگی اِت اَنت۔ چہ ایشیءَ رند،آھاں لوٹ اِت کہ مرد ءَ آئی لوگ ءِ تہءَ بندیگ بہ کن اَنت۔پمیشکہ، آھاں آئی ءِ لوگءِ آتراپ ءَ گوں سیم ءَ پوجی کلاتے بست ءُ آئیءِ راہ سر ءَ دروازگے جت۔ بندات ءَ آھانی گوشگ اَت کہ داں سپاھیگ دروازگ ءِ دپءَ اوشتوک نہ بنت تو ناں توک ءَ شُت کن ئے نئیکہ ڈنّءَ اتک کن ئے۔ ھمے سب ءَ یک نوکیں جنگے ءَ سر چِست کُت۔چوشکہ، ابو ندال اے ھبر ءَ ھچ وڑ رزا نہ بیت، پمیشکہ آھاں گُشیت: "من ادءَ مُرت کناں بلئے من ناں توک ءَ رواں نئیکہ ڈنءَ در کپاں۔ من شُد ھرتال کُت کناں بلئے من ءُ منی کہول اے لوگ ءَ ھچ وڑ یلہ نہ دے ایں ءُ نہ رو ایں۔ " ھمے وڑ ءَ ابو ندال ءَ جنگ برجم داشت۔
چُناھا، آ اے میڑ ءِ تہءَ ایوک نہ اِنت۔ درائیں مھلوک آئی ءِ ھمراہ اِنت۔ ابو ندال ءَ "United Nations " ءُ "Red Cross" ھال دات انت۔ پدا یک دیوانے ماں ابو ندال ءِ گور ءَ اڑ دیگ بوت کہ آئیءِ تہءَ "Red Cross "، "United Nations " ءُ اسرائیلی لشکرءِ اپسر ھوار اِت اَنت؛ اے دیوان ءِ مکسد دروازگ ءِ واکدارانی گیشینگ اَت۔ ابو ندال ءَ لوٹ اِت کہ اے دروازگ ءِ واک ھمائی ءِ دست ءَ بہ بیت ءُ اے دری لشکر آئی ءَ ھچ وڑیں جُست ءُ پُرس مہ کنت۔ ھمے ساھت ءَ ابو ندال ءِ دیم ءَ بازیں شرط ایر کنگ بوت، پہ درور، آئی ءَ گُشگ بوت کہ ورناھیں مردم آئی ءِلوگ ءَ اتک کُت نکن اَنت۔ بلئے ابو ندال ھچ وڑیں شرط نہ منّیت، آ گُشیت کہ، " اے منی لوگ اِنت ءُ اے ھبر ءِ شَور منی دست ءَ اِنت کہ من وتی لوگ ءَ کئے ءَ پہ آھگ ءَ بہ داراں یا مہ داراں۔ تو منءَ مہ گش کہ کئے ءَ آیگی اِنت کئے ءَ ناں۔ اے لوگ ءَ ورناھیں مردم کیت! سودا ءَ رند آھاں پدا گوشت،"شر، بلئے ادءَ کس ءَ اکس گِرَگ ءِ اجازت نیست۔" ندال پسہ دنت، "من اے گپ ءَ ہم نہ منّاں۔ ہرکس کہ منی لوگ ءَ کئیت، آ ہرچ چیزے ءِ اکس گرگ لوٹ ایت، آئی ءَ رزا اِنت۔ ترا اے چیز ءَ کار نیست۔ اے منی ذمہ واری اِنت۔ (ندال ءِ رِد ءَ اے کار اِنچو ارزان نہ اِنت چوشکہ آ گُشیت۔)اے تہنا یک نند ءُ نیادے نہ ات نئیکہ اے سودا بس پہ انوگ اِنت۔انچو بزان کہ آئی ءِ بازیں چِست ءُ ایراں پد آئی ءَلوٹ اتگیں سامان ، ھاس دروازگ ءِ کلیت رست اَنت ۔ چیزّے وھد ءَ پد، اے جاہ ءَ مزنیں مردمے ءَ رو ءُ آ کُت۔ بس دو ماہ ساری، من گوں چِل مردم ءَ اودا شُتاں۔ مئے توار کنگ ءَ پد آئی ءَ دروازگ پچ کُت ءُ ما دیوالءَ آ دست شُتیں۔ آئی ءَ ہمودا دروازگ ءِ سرءَ نبشتگ ات" ابو امرستان ءَ وش اتک ئے (اِد ءَ یاسر ارفات ءِ نیمگ ءَ شون دیگ بوھگ ءَ اِنت؛ یاسر پلستینی لبریشن آرگنائزیشن ءِ چیرمین ءُ پلستین ءِ سدر بوتگ۔)۔آئی ءَ ایشی ءَ را وتی استان جوڑ کتگ اَت۔ گڑا چوش بوت کہ آئی ءَ منءَ یک رندے گُشت کہ"پلستینی واکدار گپ ءُ تران(Negotiations) نزان اَنت، منی ھیال ءَ اے درگت ءَ اے چہ من سوج ءُ سلاہ لوٹ اَنت۔"
گڑا اے گپ کسہ ءِ یک بہرے اِت انت بلئے درستاں پُرارزشتیں بہر دیوال ءِ پُشت ءَ پشکپتگیں زمین ءِ جیڑہ اَت۔ آھاں اے پراہ ءُ شاھگانیں زمین بے شرپ کُتگ؛ اے سبز ءُ آباتیں زمین کہ ھر وڑیں بُر ءُ برّ ءَ چکار بوتگ مروچی ماں اے دیوال ءِ پُشت ءَ وڑالیگ اِنت۔ آھاں دگہ میتگے ھم وتی ھرجان جت۔ ھمے جنگ ءِ میان ءَ ابو ندال ءَ 600 ایکڑ زمین آبات کُت ءُ اِد ءَ مُرگ داشت، بلئے زایونسٹاں اے زمین ھم شگالی کُت۔ ابو ندال باز براں پہ کُمک ءِ ھاتر ءَ پلستینی واکدارانی گور ءَ شُت، بلئے آھانی گوشاں مورے ءَ ھم نہ وارت۔ اسرائیلیاں باز براں جھد کُت کہ ابو ندال جَنَگ بہ بیت؛ پہ درور، یک رندے اسرائیلی بُلڈوزر ابو ندال ءِ زمیناں پُشت دیوال ءَ ولگوج کنگ ءَ بنت تہ ابو ندال گوں آھاں جنگ کنت۔ اے وھد ءَ ابو ندال ایوک ءُ تھنا بیت، لٹ وارت ءُ بس ساہ ئے پش کپیت۔ پمیشکہ، اے پہ من شرپ ئے گپّے بیت کہ من آئی ءِ ھند ءُ دمگاں بُروآں ءُ آئی ءِ سوبمندیاں چمِ وت بگنداں۔ آ نوں اودا بے موکل ءَ روت ءُ کیت۔لھتیں ھمراھانی کُمک ءَ آئی ءَ دگہ یک ھزار ایکڑ زمین آبات کُتگ کہ اود ءَ بازیں تَھر ءِ وردن کِشگ بیتگ اَنت۔نوں کہ منی سر آئی ءِ گور ءَ کپیت، من آئی ءِ جھد ءُ سوبمندیاں گِنداں تہ دل وش بیت۔ چُناھا من ھردیں آئی ءِ گور ءَ رواں تہ گوں وت الّم کسّے ھمراہ کناں دانکہ مئے سیادی ھمے داب ءَ برجم بہ بیت۔
ابو ندال گہگیری، پاداری ءُ اوپارءِ کسہ اِنت۔ تو زان ئے، آ پُرجوش اِنت، آ جوزگ ءَ سر ریچ ءُ تمرد اِنت۔آ پہ زمین ءِ پچگرگ ءَ وتی ہر چیز ءِ دیمونی دیگ ءَ ساڑی اِنت۔ءُ آ یک تھرے ءِ چیدگی کسہ یے، کہ من ہرکس ءَ را گُشان آں، ھاس ورناھاں۔ گُڑا کدی کدی من ورناھاں اودءَ براں،پرچہ کہ اے ھژدری انت،ءُ تو انوگیں دور ءَ چوشیں مردم نہ گند ئے کہ آ اے وڑ ءَ پادار بہ بیت۔ ءُ مئے گور ءَ کہ اے جنگول است انت، آ مھلوک ءَ (کار کنگ ءِ) سکین دئینت۔وھدے منءَ گٹ بوگ ءُ زنگ جنَگءِ سما گوَر جنت تہ من وتی جند ءِ سرءَ کندگ بندات کناں،"من چیءِ بابت ءَ گپ ءَ آں"؟بس اے مردماں بچار کہ چے کنَگ ءَ اَنت۔
جُست: تئی ھیال ءَ گہگیری ءِ اے کسہ پلستین ءِ ورنا ءُ نوکیں پدریچاں ءُ راجی جُنز ءَ (پہ ھیل کنگ ءَ) چی دات کُت کن اَنت؟
جمال: اے ایوک ءَ کسّے ءِ چمّاں پچ نہ کنت،بلکیں سرجمیں زندمان ءَ بدل کنت۔ اے آھاں (ورنا ءُ نوکیں پدریچاں) وتی جند ءُ راج ءِ سر ءَ بیسہ کنگ ءِ ھاٹیگ دنت۔ البت اے پیر مرد کہ ھر وھد ءَ لٹ ئِے دست ءَ اِنت، گوں ایشی ءَ ایشاں دیم پہ دیم کنگ ءَ جیڑہ وَ است کہ پیر مرد ڈیل ءُ بالاد ءَ نزور اِنت۔ آ انچو بودناک بوتگ کہ گہگیریاں چہ سرسوبی جوڑ کت بہ کنت۔ چہ ایشی ءَ مئے تہءَ ہمے باور پاد اتکگ کہ ما ہرچی کُت کنیں۔اے چو یک چیدگی کسہ یے ءَ اِنت کہ ابو ندال ایشی ءِ کردار اِنت ءُ اے کسہ ءِ ساچوک ھم ھما اِنت۔ ایشی ءِ گہگیری وشی ءُ گلی ءِ سرچمگ اِنت، وھدے تو زمین ءَ کونڈ ئے، زمینءِ سرءَ گرد ئے، ترا سما بیت کہ تئی پاد زمین ءِ جہلانکی ءَ اَنت۔ ترا سما بیت کہ تو ایشی ءِ یک بھرے ئے،ءُ پہ ایشی ءَ مہر است،ءُ اے مہر چہ زمین ءَ پیداک اِنت۔ گڑا آھانی گیشتر وشّی ھمود ءَ اَنت، ھما جھد ءِ تہءَ کہ زمین ءِ رکینگ ءِ ھاتر ءَ بوگ ءَ اِنت۔ پہ درور، وھدے آ گند انت کہ توم تِج جنَگ ءَ اَنت، یا کہ وھدے جنریٹر ءَ گند انت کہ روژنا انت ءُ کار ءَ اِنت، اے زمین ءِ سرءَ کسءَ را رزا نہ بوتگ کہ چو بہ کنت ءُ اے ہما جہد ءِ برورد اِنت کہ انجن ءِ کار ءُ توار گوشدارگ بوگ ءَ اِنت۔ءُ پہ آیاں، ترا چو سما بیت کہ اے دمال ءُ سازے ءُ آ ناچ ءَ اَنت۔
ایشی ءِ سرپد بوگ پہ ہما مردم ءَ گران اِنت کہ آئیءَ را گوں زمین ءَ چوشیں سْیادی یے نیست اِنت۔ زورگریں زایونسٹ آباتکار لوٹ اَنت کہ تئی پاداں چہ زمین ءَ بہ سند اَنت ، آ ترا چہ زمین ءَ جتا کنگ لوٹ اَنت۔ مئے ھاٹی یک شل ءَ برجاہ اِنت۔ تو ہمینچو گیش زمین ءِ بئے، ہمینچوجھد ءِسکّیاں اوپار کن ئے، ہمینچو گیش مارئے ءُ تکانسری کشّ ئے، دو ہمینچو تو وشھال ءُ ایمن بہ ئے۔ اے زمین ءِ برورد اَنت کہ ترا رس اَنت۔اے ہما گواچنیں سْیادی انت کہ تو گوں زمین ءَ ھوار گیتکگ انت۔
اے ورناہیں پدریچ ءَ بگندئے مزنیں وئیل نہ دیستگ(1948 ءِ نکبہ ءِ وئیل ءِ ھبر بوگ ءَ اِنت)، بلئے شرّی ءَ بچار ئے تہ باھوٹی بُنجلانی تہءَ جھ منندیں پدریچ ءِ مارشت گوں ھما زمین ءَ بندوک اَنت۔ آ باگ، آ لمبو ءِ درچک، آھانی پس، میش ءُ اسپ، بوم ءُ پزل، اے ہما اَنت کہ چہ ایشاں آ جوڑ بوتگ اَنت ءُ ھمیشانی تہءَ رُستگ انت۔ اے آھانی جون ءِ کالَگ اَنت۔ اے ہمے مہر اِنت، اے سیادی ھر وھد ءَ ءُ ھر کُجا ھمے داب ءَ برجاہ بیت، ءُ آباتکار مئے جاہ ءَ بدل کُت کن اَنت، بلئے مئے مارشت ھما وڑ برجاہ بنت۔ اے پہ آ دگہ پدریچاں یک وڑے ءِ میراسے، اے مہر گوں زمین ءَ اِنت، اے سَوت، اے ناچ،اے شپ ءُ روچ ،اے بوم، ہرچی گوں ہمائی سیادی دار اَنت۔
جُست: چُوشکہ تو گوں من ھبر ءَ ئے، انچو سما بیت کہ تو دگرے نہ ئے، بلکیں وتی ءُ زمین ءِ سیادی ءِ کسّہاں کنگ ءَ اِت۔ تو وتی ءُ زمین ءِ سیادیاں چون چار ئے، اے زمین کہ تو اِد ءَ جھ منند ئے، پرچہ انچو ارزشت دار ایت؟
جمال: شوانگی زند ءِ ببا دیگ ءُ زمین ءَ چہ دور بوگ ءَ پد ھم من ءَ انچو سما بیت کہ منی ءُ زمین ءِ سیادی ءِ مارشت ماں ھونانی تہءَ اِنت، منی دل ءُ پلستین ءِ جھد ءِ مکسدانی اندرءَ اِنت۔منی ھیالءَ آ منی زند ءِ بنداتی ماہ ءُ سال ات انت کہ منی زند ءِ سرءَ سانے دور دات ءُ منءَ ابو ندال ءُ آ دگہ دہکانی پھمگ ءَ کُمک اِش کُت۔ آھاں وتی ءُ درچک ءُ دارانی سیادی گیشینت، آھاں وتی پت ءُ پیرکاں گوں نزّیکی ءِ بابت ءَ من ءَ سرپدی دات۔
اے یک سادگیں سرگْوَستے کہ تو کسانی ءَ چہ ایشاں گوز ئے۔ تو گوں وتی پس ءُ میشاں ءُ گوں کوہاں زند گوازین ئے، اے موسم ھم زندمان ءِ بھرے۔ من کہ رُدان اِتاں، ھمے وھد ءِ موسمانی چِست ءُ ایر ھیل کُت اَنت، کہ زمستان پیداگ اِنت، نوں ھزّام ءِ وھد اِنت، ءُ اے درستیں چیز چہ زمین ءَ زانگ بنت۔ آ ترا گُشیت گوں ءُ تو سرپد بئے۔ وھدے تو ھاسیں بوٹگے گندئے تہ تو زان ئے کہ پلاں موسم پیداگ اِنت۔ پہ درور، زمستان ءَ بس ماھے پیسر، تو اے رنگیں بوٹگے گندئے کہ اجب اِنت تہ ھُشکیں جاہے ءَ بے آپ ءَ رُستگ ، اناگت ءَ آ چہ زمین ءَ جاہ جنت، اے زمین ترا گشگءَ اِنت کہ زمستان پیداک اِنت۔ ھمے وڑ گوں میشاں، گوں جناوراں گُپت کنگ ءِ زبان باز دلکش اِنت۔ ءُ دلوتانی نیام ءِ سیادی ھم ، کُچک ءُ ھرّانی میان ءَ سیادی ،میش ءُ ھرانی، کُچک، ککڑ ءُ مُرگانی۔ اے درست چو یک راجے ءَ اَنت، ءُ ما ایشی ءِ زبان ءَ زان ایں، ءُ ہرکس ایشی ءِ سیمسراں زانت، ءُ وت ماں وت شریں وڑے ءَ گپ ءُ تران ھم کن ایں؛ اے درست گوں ابرم ءَ سیادی دار انت۔ تو یک ءُ ٹِک زانت کن ئے کہ مُرگ کدی پاد کاینت۔ تئی جند گوں مُرگانی توار ءَ واب ءَ پاد کیت۔ تو چہ روچ ءَ ساری گوں ہماہاں پاد کائے، آ سک چاڑکہ انت، ٹہک دیان ءَ الھان کن انت، ءُ پدا تو آہاں جہل ءَ روگءَ گند ئے، آ وپسگ ءَ رو انت۔ سُھب ءَ روچ ءِ درآہگ ءَ ساری،ہر کس پاد کئیت، میش ءُ پس ءُ دلوت جاک ءُ کوکار کن اَنت کہ آھاں ڈن ءَ در کپگی اِنت۔ چوش ارزانی ءَ تو مارا اود ءَ بند کُت نہ کن ئے۔ وھدے آ واتر انت، آ ءُ آھانی چُکانی زبان ھم ھمیش اِنت۔ ہمے داب ءَ تو ارزانی ءَ راجمان ءَ سرپد بئے، آئی ءَ گوں زندگی کن ئے۔ اے چیز دمانے ءِ تہءَ تئی مجگاں جاگہ کنت۔
ایشی ءَ ابید، ھر وڑیں جاوراں اوپار کنگ، سکی، سوریاں چہ گوزان ءَ چو درچکے ءَ رُدگی انت۔ وھدے چمّاں پُشت ءَ شانک دے ئے تہ گندئے کہ ھر پوڑ ءِ شما اے درچک رُستگ اَنت۔ نوں تو گندئے کہ ھمے چیز تئی تہءَ ھم است اِنت۔ زندگی ءِ اے رھبند تئی زندمان ءِ بھرے جوڑ بیت۔ ھمے وڑ ءَ تئی گوں ایشاں سیادی یے جوڑ بیت ءُ سالےءَ پد تو واتر ھما جاہ ءَ درچک ءِ چارگ ءَ کائے، چارئے کہ چی بوگ ءَ اِنت۔ پمیشکہ ما بدو ایں۔ ھمے رو ءُ آ ءِ سبب ءَ ما مساپر ایں۔ ما دھکان ھم است ایں۔ مارا مئے اسپ است اَنت، مارا ھرّ است، مارا کچر است۔ ما کِشت ءُ کشار کنگءَ ایں، سبزی کشگ ایں؛ ھاسکر پہ دلوتاں گلہ ءُ اے دگہ تھر ءِ توم کِشگءَ ایں۔ ڈگاراں کِشگ ءِ وھد ءَ ، تو اودءَ توم چنڈ ئے ءُ تج جن اَنت؛ اے انچیں چیزے کہ سک اژدری اِنت ، ہمے زمین ءَ کہ آ شومگءَ انت اودءَ آ توماں دَور دنت، ءُ سکیں شوکیں تماہے گوں ابرم ءَ ءُ ھُدا ءَ دار انت۔ اے توم یک دادے پہ ما، پہ مرگاں ءُ ھر ھما شئے ءَ کہ آئی ءَ اے پکار اِنت۔ آ وھدے ایشی ءَ کِشگ ءَ بنت، آ زان انت کہ اے تھنا آھانی ھاتر ءَ نہ اِنت، ایشی ءِ بھرے پہ مُرگ ءُ دلوتان اِنت۔ وھدے تو دھکانکاری کنگءَ بئے ءُ داناں ڈگار ءَ چنڈ ئے، تہ مرگاں وتی چپ ءُ چاگرد ءَ گندئے ءُ مرگ نزیک آیان بنت پہ ھمیشانی چِنَگ ءَ ،اے مئے ابرمی گواچی یے کہ ما آھاں بہ تاچین ایں، بلئے دھکان گُشیت :"ناں،ناں، ناں۔۔۔چو مہ کن" ایشانی تہءَ وڑے نہ وڑے ءَ آہانی بھر ھم است اِنت۔ ھمے مئے سیادی اِنت۔ ءُ تو گوں اے زمین ءَ بندوک ئے۔ اے رنگیں زندمان کہ تو ایشی ءِ بھرے ئے، ترا گوں اے زندءَ پہمیان کنت۔
پہ پدریچے ءَ کہ آ چہ وتئی زمیناں کشَگ بوت۔ اے وڑ نہ اِنت کہ بس اے زمین چہ آھاں چو پُلگ بیتگ، اے آہانی تھتال اَنت، اے آھانی زندمان اِنت، اے آہانی پِت ءُ پیرک اَنت، اے آہانی بندپتر اِنت، اے آہانی مارشت اَنت۔ ادءَ گوں سِنگ ءُ ڈوکاں، گوں اے ہاک ءَ ،گوں درچکاں، گوں مُرگاں ءُ دلوتاں سیادی اِنت، کہ نوں ھلاس اِنت۔ اے آہانی سرجمیں زندمان اِنت، چوش انت کہ، اے ہرچ ہما چیز ءَ چہ تئی تہءَ کَش اَنت کہ ہماہاں ترا چہ باتن ءَ جوڑ کُتگ۔ اے ہمیش انت کہ ترا بیچاڑ کن اَنت ءُ تئی اندر ءَ گہگیری ءِ آچ ءَ روک کن انت۔ پرچہ کہ چیزے گار اِنت،اے مارشت یکشل ءَ ھمے داب ءَ اَنت،اے زمین ءَ چہ دوری اِنت۔ ھمد ءَ چہ کُربانی دیگ ءِ آٹیگ ودی بیت۔ پلستینی آشوب چہ ہمودا بندات بیتگ، چہ باھوٹی آں، چہ ہماھاں کہ وتئی زمین ءَ گسر کپتگ اَنت۔ ھر وھد ءَ، چو کہ دار پہ آس ءَ اِنت، اے آشوب مئے مہلوک ءَ ھمے داب ءَ گہگیری ءِ شُبین ءَ دنت۔
جُست: چوشکہ ما پلستین ءَ چہ ھستیں واکداراں بگر داں زایونسٹ اسرائیلی آباتکارانی زورگیری پروجکٹ، "Apartheid Regime"ءُ ایردستی ءَ چہ آجوئی ءِ بابت ءَ جیڑ ایں، اردیں تو یک آجوئیں ءُ وتواجہیں پلستینے ءِ بابتءَ جیڑ ئے، گڑا آ آجوئی ءِ جند ترا چون گندگ ءَ کئیت؟
جمال: ما گند ایں کہ 1948 ءَ بگر داں مروچی مئے زمین ءَ گوں چے وڑ بدکاری کنگ بوتگ۔ زورگیریں آباتکاراں درستیں سورّانی سرءَ ایردست کُتگ، درستیں آپ پلیت کُتگ اَنت، ءُ زمین ءَ گوں مئے سیادی نزور کُتگ؛ داں زمین پلگارگ نہ بیت، کس اود ءَ واتر شُت نہ کنت۔ وھدے تو ماشینءِ سر ءَ چہ اد ءَ گوز ئے، تہ کوھنیں گِساں ماں پلستینی کوچگانی تہءَ دیست کن ئے؛ آ چی پیم بندگ بوتگ اَنت، تو مارئے کہ اے لوگ انچوش جوڑ کنگ بوتگ اَنت کہ ابرمی چھرگ ءَ بہ جن اَنت۔ ترا ابرم ءُ اے گسانی تہءَ دگری گندگ ءَ نہ ایت۔آ گس گوں زمین ءَ نزیکی کن اَنت۔ آھاں وتئی گِس کوہ ءِٹُل ءَ یا ڈگارانی جاہ ءَ نہ بستگ اَنت بلکیں کوہ ءِ بُن بستگ انت۔آھاں انچیں جاہ گچین کُتگ کہ زمیناں چہ دور مہ بنت، آھاں پھریز اِت بکن اَنت ءُ ابرم ءَ تاوان مہ دئینت۔ آجو بوگ ءِ ھاتر ءَ، مارا سرجیکل اپروچے پکار بیت۔ اردیں گوں من بوتیں تہ من سرجمیں آباتکار در کُتگ ات انت، ھچ نیشتگ اَت۔ اردیں تو گوں زمین ءَ ھمدپ بوگ لوٹ ئے تہ ترا باز چیز شر کنگی اِنت۔
دومی، مارا ھما ردیں سِنچ مٹ کنگی انت کہ آھاں مارا اے جاوراں سر کتگ؛ اے سرجم ءَ ھلاس کنگی اَنت۔ماراسرمایہ داریں ءُ گلامیں سِنچ ءُ سماءَ اے جاہ ءَ سر کُتگ۔ ھمے سوچ ءَ مارا دروھِتگ، ھمیشی ءِ سبب ءَ پلستینی واکداراں وتی مکسدشمُشتگ۔ وتی زمین دروھِتگ، وتی مردم رد داتگ اَنت؛ اے درست گلامیں سوچ ءِ دین اَنت۔ یک ھسابے ءَ پہ بازیں مردماں اے یک ناامیتی یے۔ پلستینی واکدار وتءَ را پلستینی مہلوک ءِ رھشون لیک اَنت، بلئے چوش نہ اِنت۔ آ ھچ رنگ ءُ داب ءَ مھلوک ءِ رھشون لیکگ نہ بنت۔ اِیشاں پلستینی بندپتر لیگار کرتگءُ پلستین ءِ مھلوک ءِ نام ءُ کِرد بے شرپ کُرتگ اَنت۔ آجوئی ءِ ھاتر ءَ درستاں پیش مارا گلامیں سسا بدل کنگی اِنت۔
سیمی، پہ مارا اژدری اِنت کہ ما وتی مہلوکءِ مگزاں اوں آجو بہ کن ایں، پرچہ کہ مئے مہلوکءِ مگز اوں زورگیری ءِ آماچ اَنت۔ آھاناں واتر زمینی راستی ءَ گوں ھمدپ کنگی اِنت، آھانی تہءَ وت بیسھی مارشت ودینگی اَنت ءُ آھاناں ھستیں جاوراں آشنا کنگی اِنت۔
جُست: تو وھدے اے زرمبشت ءِ کاراں گوں دلگوش بوتگ ئے تہ ترا ایدگہ ایردست ءُ زورگیری ءِ آماچیں ھندی مردماں (Indigenous People) گوں دُچار کپگءِ موہ رستگ؛تو گوں آھاں گوازینتگیں یاتگاریں دماناں گیرآرت کن ئے؟
جمال: اسرائیلی اپارتھیڈ ویک (Israeli Apartheid Week) ءِ میان ءَ کہ من اولی بر ءَ کینیڈا ءَ تران کنگ ءَ اتکاں تہ دیوان ءِ آرگنائزرانی کُمک ءَ من ءَ گوں لہتیں ھندی مردماں (Indigenous People) دیوان کنگ ءِ موہ رست ۔ ھمے دیوان ءَ من آھانی دیم ءَ وتی لیپ ٹاپ پچ کُت ءُ آھاناں پلستین ءِ لہتیں اکس پیش داشت کہ آپیلوشتگیں ڈگارانی ، زورگیری، زمینانی پُلگ ءُ درچک ءُ دارانی ءُ مئے گھگیری ءِ چکپروش کنگ ءِ بابت ءَاِت اَنت۔ اے ساھت ءَ دیوان سک شوک اَت، ءُ من ءَ آ ھبر شر یات اِنت کہ کماش ءَ گوں من کُت۔ آئی ءِ چم ارس اِت انت ءُ من ءَ گُشت ئے، "وتی جنگ ءَ برجاہ دارئے، بلئے ھیال بہ کن اِت کہ شُمئے آکبت چو مئے وڑ ءَ مہ بیت۔" اے پہ منءَ ٹوہیں رنجے اَت۔ من مرد ءِ توارءِ تہءَ ناکامی ءِ مارشت دیست۔ آہاں ھبر کُت کہ گوں آھاں چے چے بوتگ، کہ چون سرکار ءَ آھانی زمین ءِ سرءَ شاہدگ بوتکگ، چے پیم کارپوریشن ءِ مردماں آھانی ھند ءُ دمگ گوں کیمیکلاں لیگار کُتگ اَنت ءُ آھانی زمین پُلگ بیتگ اَنت۔آھاں گُشت کہ مئے ءُ آھانی مارشت یک اَنت۔ وھدے تو دگنیاءِ ایدگہ ایردستیں راجاں گوں دُچار کپ ئے، ترا سما بیت کہ زورگیر ھر کُجا ایردستیں راجاں گوں یکیں داب ءَ پیش کیت؛ آ ایردستیں راج ءِ مادناں پُلیت، آئی ءَ وتی پائدگانی ھاتر ءَ کارمرز کنت ءُ گڈسر ءَ کُشیت ءُ ھلاس کنت۔ سرمایہ دار/زردار پمیشکہ کپتگیں بستارے دار اَنت کہ آ دگراں داتگیں تاوان ءِ بابت ءَ ھچ نہ جیڑ اَنت۔
دگہ یک رندے چوش بوت کہ امریکہ ءَ چہ ورناہیں ھندی مردمانی ٹولی یے ماں پلستین ءَ مئے گور ءَ اتکگ اَت تہ مارا گوں آھاں دیوان کنگ ءِ موہ رست۔ اے پہ من یک شرپے اَت کہ گوں آھاں یکیں کوٹی ءَ یکے دومی ءَ گوں دیم پہ دیم نند ءُ نیاد بوت۔ چوشکہ ورناھاں چہ کس زانگ ءَ نہ ات کہ کُجا چہ گپ بندات کنگی اِنت، پمیشکہ بندات ءَ کس ءَ گپ نہ جت ءُھر نیمگ ءَ بس ھاموشی اَت۔ اے ھاموشی ءَ پروشگ ءِ ھاتر ءَ من درّائینت، "امریکہ ءِ ھندی مردم وتی جھد ءَ بے سوب بوتگ اَنت۔" من چارگ لوٹگ ءَ اِتاں کہ اے ورنا چون کن اَنت۔
اے پہ ورناہانی جہ سِرّینگ ءَ بس اَت؛ ھمے دمانے یک ورناھے اوشتات ءُ زوراں گُشت ئے کہ "ناں، چوش نہ اِنت۔" نوں ھمُک مردم ءَ گپ جَنَگ ءُ کسّہ آرگ بندات کُت۔ اے پدریچ ءِ ورناہانی تہءَ ٹوہیں زھرگے مان اَت۔ دوئیں جاہانی ورناھاں وتی جہد ءِ کسہانی آرگ بندات کُت؛ کہ مارا گوں چے چے بوتگ، وتی کوچگانی ءُ ٹکّانی سرءَ ایردستی ءِ بابت ءَ کسّہ اش آؤرت۔ مئے ءُ آھانی نیام ءَ زمینی دوری، ءُ مئے ایردستی ءِ وھد ءِ تپاوت ءَ ابید مئے کسّہ سرجم ءَ یک اِت اَنت۔"Turtle Island "ءِ ھَندی مہلوک ءِکسہ 500 سال ءَ پیسر بندات بوتگ اَت۔ مئے جیڑہ ءَ بہ گندئے سد سال بہ بیت، بلے مئے کسّہ یکین اِنت۔ وھدے مہلوک اے گیشینگ ءَ اَت کہ گوں آہاں چے بوتگ،تہ دوئیں نیمگ ءَ یکیں جاور اِت اَنت۔ جیڑہ ءِ جند زمین ئیگ ات۔ ما چہ مئے ڈیھ ءَ گلینگ بوتگ اَتیں۔ مئے دیمءَ شرّی ءَ زاھر اَت ءُ ما گندگءَ اَتیں۔ اسرائیل یک چیزے کنگءِ کوشست ءَ اَت کہ مئے سرءَ ھما رھبنداں کارمرز بہ کنت کہ امریکہ ءِ ھندی مردمانی (Native Americans)سرءَ کامرز بوتگ اَنت۔ما دربرتگ اَت کہ اودءَ چون زورگیری کار کنگ ءَ اِنت، ءُ ما نہ لوٹ ایں کہ ریزرویشنانی (Reservations) سبب ءَ ما ساہ زُرت مہ کنیں۔
چوناھا من بھ نہ جیڑ اِتگ کہ "Turtle Island " جیڑہ ءَ سرپد بوگ یا پراھاں ھمدردی دارگ ءِ ھاتر ءَ من ءَ گوں آھاں دچار کپگی اِنت۔ ما وھدے کسان بوتگ ایں تہ امریکی تامُرانی تہءَ "شرّیں امریکی مردم" ءُ "بدیں امریکی مردم" ءِ ھیال درشانی ءَ دیستگ؛ آھاں بدیں امریکی مردم "Red Indians" ءِ نام ءَ توار کُتگ اَنت کہ آھانی کُشگ ھم روا بوتگ۔ اے نام ءَ ایشاناں چہ وتی بُنُکی زمین ءَ جتا کُتگ اَت۔ زمین ءِڈُبّہ ھر وھد ءَ ھَندی مہلوک ءِ کوپگاں بوتگ، پمیشکہ اے زمینءِ کدر ءُ بستار ءَ زان انت۔ اے ہما ات انت کہ چہ ہمے ھاک ءَ جوڑ بوتگ اَت اَنت— آہانی سِتک،آہانی سُر ءُ پُر، آہانی پُچ ءُ پوشاک، زندمان ءِرھبند ءُ آہانی دود ھم ھمے زمین ءِ برورد ات اَنت۔ ایشانی گور ءَ ھر چیز گواہی دنت کہ اے نہ تھنا زوراکی ءِ آماچ بوتگ اَنت بلکیں اے یک بدتریں چُکچینیءِ آماچ ھم بوتگ اَنت۔ پمیشکہ، من ھروھد ءَ ایشانی ھیال ماں دل ءَ داشتگ اَنت؛ اے چیز ءَ تو مار اِت ھم کن ئے۔ پہ مارا اژدری اِنت کہ ما گوں آہاں چار ءُ بیچار بہ کنیں ءُ دیم پہ دیم بہ گند ایں کہ چے بوگ ءَاِنت۔ من وتیگ ءَ گُشاں، منءَ اے موہ رستگ کہ من ھَندی مہلوکاں بگنداں ءُ گوں آہاں ھبر ءُ ھال بکن آں۔ آ مروچی ھم پدکِنز نہ بوتگ اِنت ءُ اے ساھت ءَ ھم وتی جھد ءِ بیرک اش بُرز داشتگ؛ اِنچو سال ءَ پد ھم آھانی جھد برجاہ اِنت۔ من ھچبر چوش گُشت نہ کن آں کہ آ بے سوب بوتگ اَنت۔ آ زندگیں مردماں ءُ آھاں وتی جھد ھم زندگ داشتگ؛ آ دگنیا ءَ بار بار ھیال ءَ گیج اَنت کہ اے (آھانی جاورھال) مردمی بندپتر ءُ مردمگریءِ سر ءَ سوالے۔ من ءَ باور نہ کنت کہ کسّے ایشانی تاوان ءَ پُر کُت کنت؛ ھما تباھکاری ءَ چہ کہ اے گوستگ اَنت، ایشانی زمین ءِوئیرانی، ءُ ایشاں چہ زمین ءَ سندگ ءِ تاوان سک مزن اِنت (کہ گوں کس ءَ پُر کنگ نہ بیت۔) بلئے من ءَ اُمیت اِنت کہ یک روچے ایشاں وت واجہی رس ایت ءُ اے ھما وڑ کہ بوگ لوٹ اَنت، ایشاں آ وڑ بوگ ءِ آزاتی بیت۔
ھما اِنت کہ منی گوں ایشاں گِند ءُ نند بوتگ، من جھد کُتگ کہ اے جھد ءَ یکمُشت ءُ تپاک بہ کن آں۔ مارا چہ یکے دومی ءِ پلہ مرز بوگ ءَ دیمءَ روگی اِنت، تھنا نگیگیں جاوراں کُمک کنگی نہ اِنت، بلکیں اے جھد سرجم ءَ تپاک کنگی اَنت۔من لوٹاں کہ پلستینی، اپریکی، ایشیائی، لاتینی امریکہ ءُ دگنیا ءِ اے دگہ ھند ءُ دمگانی ھندی مھلوک مردمی اگبالانی ھاتر ءَ یک میاں اُستمانی جھدے ءِ بھر بہ بنت۔ اے بلکیں یک رومانی ھیالے بیت، بلئے اے منی یک وابے، وھدے ما جھد ءَ دنیائی جہت ءَ پراہ ءُ شاھگان کنگ ءِ گپ ءَ جنیں تہ ایشی ءِ بزانت ایش اِنت کہ مئے سنگر یکے بیت، ءُ آ زرداری نظام (Capitalism)ءِ ھلاپ بیت۔
جُست: تئی ھیال ءَ شُما آوکیں چندیں دھکانی (Decades) تھا پلستین ءَ وتواجہ یا آجو کُت کن ئے؟
جمال: ھُدا مھربانے، پرچہ (آجو) نہ بئیں۔ منی ھیال ءَ مئے مھلوک ءَھمے اُمیت ءَ جھد ءِ دامن داشتگ۔ ما مہکمی ءَ ستک دار ایں کہ بدلی پیداک اِنت ءُ ایش کہ— تو وَ زانئے، تو مردمانی دپ ءَ چہ اشکرتگ، گیشتر پیریں مردم گُش اَنت کہ "اے پاکیں زمینے، اِد ءَ زوراکی ھر وھد ءَ نہ مان ایت۔"
مئے زمین ءِ سر ءَ زایونسٹانی زورگیری دگنیا ءِ اے دگہ زورگیریں تاگتانی سبب ءَ ناں تھنا برجاہ اِنت بلکیں گیش مُھکم بوتگ۔نوں اے امریکیانی دست ءَ انت۔ میانی رودراتک ءَ کہ ہرچی بوگ ءَ اِنت، منی ھیالءَ ہمے سکیں تُرندیں ءُ دردناکیں بوتِن ءِ بھر اِنت، کہ آئی ءَ سالانی سال پکار بنت؛ اے سک گران نہاد بیت، ایشی ءَ پہ اے دمَگ ءَ ھم سکیں گرانیں مُلّے دیگ کپیت۔ منی ھیال نہ اِنت کہ اے ھُشکیں گپے یا نوکیں زورگیری باریگے بندات بہ بیت۔ اے کُربانی پہ مہلوکاں نوکیں ءُشرتریں باریگے کار اَنت۔ شام ءَ بگر داں لبنان ءَ، یمن ءَ بگر داں عراق ءُ پلستین ءَ چہ مصر ءَ ، دراہیں مھلوک لگتمال اِنت۔ آ داں چُنت وھد ءَ مھلوک ءَ ایردست کن اَنت۔ ءُ مارا مردمانی سرءَ سِتک ءُ باور انت کہ گڈسر ءَھمے مردم اَنت کہ اے کسّہ ءَ ھلاس کن اَنت۔
جُست: منی گُڈی جُست ایش اِنت کہ تئی نِزّ ءَ آزاتی ءِ مانا چی اِنت؟ اگاں تو آزاتی ءَ ھیال بہ کن ئے گڑا ترا آزاتی چون گندگ ءَ کئیت؟
جمال: باز گچین!(داں دیراں ھاموش بوگ ءَ پد) اے ھَک ءُ دل مزنیں لبزے ءُ داں کسّے ءَ چہ آئی ءِ آزاتی پُلگ نہ بیت، آ ایشی ءِ گران کمیتی ءَ زانت کُت نہ کنت۔ تو داں ھما وھد ءَ ایشی ءِ کدر ءَ نہ کن ئے دانکہ تو آزات ئے۔ آزات ءِ بزانت ایش اِنت کہ تو وتی دل ءِ تب ءَ وتی زند ءَ بہ گوازین ئے یا تئی راج ھما داب ءَ زندگی بہ کنت کہ آ لوٹ ایت۔ وھدے تو آزات بئے تہ کس ترا جُست نہ کنت کہ "کُجا روگ ءَ ئے؟" یا "تئی پجّار چی اِنت؟" چد ءُ پیش من نہ زانتگ کہ آزاتی ءِ مانا ءِ گیشینگ چوش گران بیت۔ بچار، وھدے من پلستین ءَ نہ باں تہ ماراں۔ ھمے وھد ءَ من ءَ مارشت بیت کہ ما چونیں نگیگیں جاورھالانی تہءَ زندگی کنگ ءَ ایں۔ وھدے من دری ملکاں شُتگ آں، تہ بازیں جاہے بے سپاھیگ ءُبے کالونیاں دیستگ؛اود ءِ مہلوک ءِ چمانی تہءَ زھر نہ دیستگ۔کدی کدی من/ما پہ مرگاں دل ءَ کینگ ایں۔۔۔ما/من چہ انچیں جناوراں کینگ ایں کہ آھاں بال کنگ ءَ سیمسر نیست ءُ چوشیں ھچ جاھے نیست کہ آئی ءَ کسّے بہ دار ایت، یا کسّے آئی زندگی ءِ تہءَ دزمانجنی بہ کنت؛ تئی واب ءَ ھم کس ھراب مہ کنت۔ وھدے تو زورگیری ءِ آماچ بئے تہ تئی تھا چیزّے پش کپیت۔کدی کدی تو واب ھم دیست نہ کن ئے۔ ترا انچو گُمان بیت کہ واب گِندگ تئی دزرس ءَ نہ اِنت۔ کدی کدی تو سکّیں انچائیں واب گندئے؛ واب ءِ تہءَ کسے تئی لوگ ءِ دیمءِ دروازگ ءَ ولگوج کنت۔واب ءَ پاد کائے تہ گندئے کہ لوگ ءِ دیوال گار اِنت، سپاہی گار اَنت، سنگر گار اَنت ءُ ھچ وڑیں واکدار درا نہ بیت۔ پمیشکہ اے گڑ ءُ منج اِنت؛ یک گڑ ءُ منجیں ءُ رھبند داتگین چیزے کہ یکجاہ اتکگ۔
تو انچو مارئے کہ کسّے ءَ ترا گُٹگیر کُتگ۔ترا چیزّءِ تہءَ ورگ ءَ اِنت بلئے تو ھچ کُت نہ کن ئے۔ دانکہ من آزاتی ءَ چمِ وت نہ گنداں، منی ھیال ءَ من زانت نہ کن آں کہ آزاتی چی یے۔ ھما وھد ءَ کہ من چریشاں کس اِد ءَ مہ گِنداں، درائیں زورگیر چہ ما اندیم بہ بنت۔ منی دل ءَ دانکہ مئے زورگیراں چہ یکے ھم مئے دیم ءَ اِنت، من داں ھما وھد ءَ گُشت نہ کن آں کہ آزاتی چی یے۔ بوت کنت کہ چد ءُ پد گُڑا من شُمے جُست ءِ پسّہ ءَ جوانی ءَ دات کُت بہ کن آں۔
__________________________
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔