"آسیاب"
اختر رضا سلیمی خیبر پختونخواہ نا ہندی و اسہ پنی ءُ شاعر ئسے۔ اونا شاعری منہ وخت ئٹ بھاز پنی مس۔ او تینا بولی و ادب تون ہندی تہذیب و دود ربیدہ نا شونداری کن مدام جوزئی ءُ وڑ اسیٹ گام خلیسہ روان ءِ۔ خاص وڑ ئٹ اینو نا شاعری نا حوال ءِ تریسہ ناول نا کنڈ آ بریک و ادب ئٹ ناول نا سر حال ئٹ خواجہ نا خڑکی و تابعداری ستا کڑزیک۔ اندن اردو آن ہلیس انگریزی و روسی ناول تا فن فکر و اسلوب نا زی آ گچین ءُ حوال تریسہ خنگک۔ "جندر" اختر رضا سلیمی نا ناول ئسے ہراٹی او تینا تہذبب نا شیفی و بُڑزی تے ناول ئسے نا دروشم ئٹ گنڈانے و مونی ایسونے۔
اردو ناول "جندر" ءِ تینا لمئ بولی براہوی ئٹ "آسیاب" ٹی مٹ کروکا ورنا حسن ناصر بولی و ادب تون مہر تِخنگ تون اوار سُونج ءَ رونج کروکو فنکار ئسے۔ اندا بابت ئٹ خواجہ مٹ و بدل نا پِڑ آ تینا گام ءِ مُستی تخانے۔ اونا براہوئی ادب تون خڑکی و مہر ئنا درشانی دا کتاب نا دروشم ئٹ پاش ءِ۔ شاعری تون اوار افسانہ دسوک آ دا ورنا تینا بولی نا ردوم و شونداری کن جوانو کچ اسیٹ ادب تون تینا مہر و شونق نا درشانی ءِ کرینے۔ براہوئی ادب ٹی مٹ و بدل نا گُرج ءِ پوہ مریسہ دا اونا اِرٹمیکو گام ءِ۔ دا ناول ءِ خواننگ نا وخت آ ہچ دا گُمان مفک کہ دا بدر ءُ زبان ئسے نا ناول ئسے۔
داسا نن مٹ و بدل نا کنڈ آ برینہ، ادب ءِ سوگو و گُشاد تِننگ پُوسکن فکر و سوچ خوندی کننگ و جہانی ادب ءِ تینتو جہی کننگ ئٹ مٹ و بدل نا بھلو کڑد ئسے۔ دا پڑ آ حسن ناصر نا "آسیاب" نا دروشم ئٹ اسہ گچینو گام ئسے ہرادے براہوئی ادب نا خوانوکا تیکن پوسکنو رنگ ئس دو بریک۔ اندن براہوی ادب ئٹ نَثر، ناول، مٹ و بدل نا گرچ و زلورت ءِ مونی تِخیسہ ورناک دو تے لانچانو۔
ہیت گر ناول آ برے گڑا دا ناول اسہ سوج ئسے آن بناء مریک۔ ہراڑے پیر انگا "ولی خان" ہرا کہ تینا مُچ عمر ءِ آسیاب نا کوٹی ٹی گدارانے ولے داسا تینا زند ئنا گڈیکو ساعت ئٹی ہمو آسیاب نا کوٹی ٹی تموک بیم و خلیس نا پلویڑ ئٹ اندا گڑتی ٹی مریک کہ "ہرا وخت مرک ئنا خُمب ئٹ مروٹ تو او اولیکو بندغ دے مرو، ہرا کنا جون ءِ خنو"۔ اودے تینا مرک آن ودیک ہمو بروکا بندغ نا پام مریک۔ ناول ئٹ ساڑی بنجائی کڑد ولی خان نن ئنا مسہ پار ئٹی تینا زند نا آزموندہ و تدوکا دو سد سال و ساڑی آ وخت ئنا حوال ءِ تالان کیک۔
زند و مرک ئنا نیام ئٹ گڈیکو "دو سد سال نا " ساعت۔
دا ناول آسیاب نا کوٹی آن بناء مریک۔ ہراڑے ولی خان ءِ دا ہیت ئنا پک گمان مریک کہ او پگہ سوب ئنا گربام آن پد دے ٹِک نا رژنائی ءِ خَنپرو۔ اودے تینا نفس نا سڈنگ آن گڈ بروکا بندغ نا فکر و پام، بیم و خلیس نا گواچی کیک۔ اندا درگت ئٹ اودے وڑ وڑ ئنا گڑتیک پلویڑ ئٹ ہلیرہ ہرافتے توننگ اونا وس آن تِیر مریک۔ او وخت ئس گُمان کیک کہ کنا جُون اندا آسیاب نا کوٹی ٹی ڈونڈ اس مرو۔ وخت اس اودے ہندا گڑتی پلویڑ کیک کہ کنا جون ءِ جوجِک و مُورینک آک کُنیسہ چَٹ کرور ۔ ایلو کُنڈ آ اودے پین گڑتی اس الیک کہ کنا جُون ءِ جنگل نا ساہداک گر کرور درور. ولی خان ءِ تینا کہنگ نا پک یخینی انداخہ در مریک کہ او ہرا وخت انبار چپ کوٹی نا درگہ ءِ ملوک اِلک۔
ولی خان تینا تدوکا مچ زند ءِ آسیاب نا کوٹی ٹی گدارا۔ نُسخل یعنی "آسیاب" ہراٹی او غَلہ آتے نُساکہ و نُت کریکہ ولی خان نا زند تون مُٹخ آنبار تفوک ئس او تینا زند آن دا اسیاب ءِ جتا کننگ ئٹ اسُل سر سہب متو۔ اندن خننگاکہ ولی خان تینے دا آسیاب آن جتا کننگ نا اسل کوشست ءِ ہم کتو۔ اودے دا آسیاب تون عشق اسکہ دا آسیاب اودے تینا بَندی کریسس، ہراتم اوٹی غلہ نا گونی ءِ چپی کریکہ گُڈا آسیاب آن زیباو توار ئس بش مسکہ۔ ہندا پُڑتا توار اودے زند ئس بشخاسس، بیدس دا توار آن اودے تغ بتوکہ۔ آسیاب نا کوٹی خلق آن مُر جنگل ئسے آ ئسکہ۔ ارا نا ایب کیب ئٹ مش، جل و دیر ئنا چشمہ غاک ئسُر او آسیاب نا گور آ ہر وخت دیر ئنا زمبارہ ئس۔ خلق نا مخلوق میل ئسے نا پند ءِ خلیسہ آسیاب نا کَسر نا کھڈ و بھینٹ آن انت بدحالی سے ئٹ بریسہ تینا غلہ تے نُسینگ کہ ہیسُرہ۔ اندا درگت ٹی آسیاب نا اندا کسر ئٹ مخلوق نا ہن و بر ہم بھاز ئسکہ ہرا نا اسہ سوب دا ہم ئسکہ کہ دا کسر ٹیکسلا و کشمیر ءِ اوار شاغاکہ۔ کسر اندن آباد ئس کہ شام ئنا تارمئی آن پد ہم مخلوق نا ہن و بر ئسکہ ہراٹی خلق ئنا بندغ تون ہند بدر ہم دا کسر آ سفر کریرہ۔ ولی خان اندا رونق آتے ٹی زند ءِ تدیفنگ ئس، دے ٹی چندی غلہ نا گونیک بسرہ او ہندا گونی تے آسیاب ئٹ چپی کریکہ وا اسیاب نا زیبا غا توار آن چس ہلککہ و ہراتم دا غلہ غاک نُسنگارا گُڈا آسیاب آن چیہانٹ انبار ءُ توار ئس بش مسکہ ہراڑان ولی خان ءِ اسُل بد بسکہ۔
ناول نا ارٹمیکو ساڑی ءَ کردار بابا جمال دین ہرا سیالی آن مُست ولی خان نا اسِٹ انگا سنگت ئس، ولے سیالی ٹی ولی خان نا الّہ ئس ہرادے پین زنک الو۔ او ولی خان ءِ تینا سنگت و اولیاد پاریکہ۔ سنگتی دا وڑ ئٹ کہ او ولی خان ءِ چُنک سنی آن خلقی آ کسہ تے بنیفسہ ئس۔ او نا مغز خلقی آ کسہ تیان پر ئسکہ و گچین و وڑ اسیٹ کِسہ پاریکہ، بنوکاتے اندن تینا پارہ غا چِکاکہ کہ اوفک ہوش سار آن پرینگوک کسہ نا کُڑمبی تیا ڈب الکُرہ۔ بابا جمال دین نا اسہ پین فن اس بھاز پنی ئس، کہ او تدوکا وخت ئنا کِسہ تے بدل کریسہ ساڑی آ وخت تون اندن گنڈاکہ کہ کس نا گت و گمان ٹی ہم تمتوکہ۔ ہر سوب لنگ لنگ مریسہ آسیاب نا کوٹی آ تینے سر کریکہ و تینا پُتنک آن اسہ پُوسکنو کِسہ اس کشاکہ و ولی خان ءِ بنفیکہ۔
ولی خان نا مار ہرا داسہ بَھلو افسر اس ئس تینا چُنا و زائفہ تون شار ئٹ زند ءِ خوش بالی ئٹ گدریفنگ ئس، سال ئٹ ارا وار خلق ئٹ سیل سوات و چھٹی تے گدریفنگ کن بسکہ۔ تینے آسیاب ئسے نا مار اس سرپند مننگ آ شکی مسکہ او دا ہیت ئنا شار ئٹ کسے درک الو کہ اونا باوہ آسیاب ئسے۔ او ہراتم شار ئٹ بسکہ تینا باوہ نا آسیاب آ بسکہ و باوہ ءِ پاریکہ " بس کر دا آسیاب نا کاریم ءِ داسہ پیر مسُونس داسہ کان کنتو شار آ آسراتی نا زند اس گدریف دا آسیاب نا انت زلورت ". ولے اودے دا درک الو کہ اونا باوہ دا آسیاب تون اندن تفنگانے کہ دا آسیاب نا توار آن بیدس اودے تُغ بفک۔ او دا آسیاب آن بیدس زند ءِ گدارنگ نا گُمان ہم کپورو۔
ولی خان نا دا آسیاب تون دا عشق و دا نا بندی مننگ نا پد ئٹ بھلو کسہ اس ئس۔ دا آسیاب ولی خان نا میرات ئسکہ۔ اونا پیرہ نا پیرہ آک ہراتم دا خلق ئٹ بسر گڑا او داڑے بدر ئسر۔ اوفتے داڑے ہچو ڈغار اس الو۔ دا آسیاب ءِ ولی خان نا پیرہ نا پیرہ و اونا چُنکا ایلم ءِ اُوفتا دلیری و پہلوانی نا داد ئٹ ہمو وخت ئنا راجہ ٹیکی تِسس۔ ہرا پیڑی تا پیڑی داسہ ولی خان نا دُو ٹی بسُسس۔ ولی خان آن مُست اونا باوہ آسیاب ئٹ ئس۔ باوہ نا اسِٹ انگا مار ہرا برام آن پنچ سال پد ودی مسسس۔ ولی خان نا لمہ اونا ودی مننگ تون کزّیت کرے۔ اونا باوہ نا تب ءِ اونا لمہ نا اِننگ آن پد چپی اس ماگیر کریسس۔ ولی خان اندا آسیاب ئٹ تینا باوہ تون بلُن مسس۔ اونا باوہ اودے خلق ئنا سکول ئٹ داخل کریسس، و اودے بھاز دوست تِخاکہ۔
دا مہر، مریبت، سیوت و اواری نا وخت آک ئسر۔ خلق ئٹی امرو مچی، اواری، برام و مرک اس مسکہ خلق ئنا ہندیک تینتو ہم کوپہ ئسر۔ اَشر تیا اننگ و تینا بشخ ءِ شاغنگ خلق ئنا ہندی تیا فرض ئسکہ۔ کس اس اگہ لاب ئنا وخت آتیٹ اشرتیا پدی کشاکہ تینے گُڈا خَلق ئنا بندغ آج اودے جُوان تکتورہ۔ اندن ولی خان نا باوه ہم لاب ئنا وخت آتیٹ لشی ءِ کشاکہ تیز کریکہ و آسیاب نا کوٹی ءِ کُفل اس خلیسہ اشر تیاں پیشتماکہ۔ ولی خان نا باوه ءِ خلک ئٹی ڈغار الو ولے پدا ہم اشر تیا ہر سال تینا بشخ ءِ شاغاکہ۔ دا رسم خلک ئٹی پیڑی تیان برجاء ئس ہندا بابت ئٹ خلک ئٹی سیوت و اواری نا دور ئس۔ دا رسم و رواج آتا پوروی آن گڈ ولی خان نا باوہ پدا بسکہ و آسیاب ئٹ تینا کاریم ءِ بنا کریکہ۔ ولی خان سکول آ ہناکہ بسکہ او اندا آسیاب نا کوٹی ٹی تینا باوہ تون جل ئسکہ۔ ولی خان نا باوہ ہر وخت چپ ئس۔ ولی خان ءِ اونا لُمہ نا کسہ تے بنِفیکہ ولے گراک آتون بیدس کاریم نا پین ہچ ہیت کتوکہ۔ بابا جمال دین نا پاننگ نا رد ئٹ کہ ولی خان نا لُمہ نا کزیت آن پد اونا باوہ ءِ چپی اس ماگیر کریسس.
ولی خان ہژدہ سال ناس ئس کہ اونا باوہ کزیت کرے۔ او ہڑدے آنبار اسکول آ ہناسس وا بننگ تون اوار آسیاب ئٹ تینا باوہ نا یخ پخ انگا جون ءِ خننگ تون اونا اماخ پرینگار گڈ سر ئٹ اودے ہچ سجِتو ولے او اومیت کریسہ خلک کن سر الک و الہ نا تینا اُراغا ہِنا و کزیت نا حوال ءِ تِس۔ ولی خان تینا باوہ نا اننگ ان پد تینا الہ نا اُرا ٹی منہ دے اڈ کرے، پدا زوت اندا فیصلہ ءِ کرے کہ او داسہ آسیاب ئٹ کائے۔ الو سر ئٹ اونا الہ شام ئنا آسیاب ئٹ خاچاکہ اوڑان پد است جم مَس کہ ولی خان داڑے داسہ تنیا مننگ کیک گڈا او تینا اُراغا ہنا۔ ولی خان اندا آسیاب ئٹ مشغول ئس و الہ جمال دین سہب ئنا بسکہ و شام ئنا ہِناکہ۔ اندا وخت آتیٹ ولی خان کتاب آتون سنگتی کرے او کتاب خواننگ بناء کرے۔ خلک آن مخلوق غلہ نُسنگ کہ ایسکہ، ولی خان غلہ نا گونی تے آسیاب ئٹ چپی کریکہ و اسیاب نا پاٹی آ میخ ءِ جُبی تریسہ آسیاب نا پڑتا توار آن چس ہلیسہ خواناکہ۔
پنی آ کسہ پاروکا جمال دین کسہ پاننگ آن چپ داسہ ولی خان آن ناول تے بنگکہ و ولی خان ناول تے خوانیسہ الہ جمال دین ءِ بنفیکہ۔ وا ہڑتوماک توسرہ ناول نا کڑدار و کسہ نا زی آ شرہ کریرہ۔ وخت اندون تدینگ ئس کہ حاجرہ ہرا ولی خان نا الہ نا مسِڑ ئس او ہم دافتا محفل ئٹ اوار تما۔ حاجرہ تینا خلک ئنا اولیکو دئے پاس آ مسِڑ ئس۔ داسہ ولی خان نا باریم مچے سبک مس ہراتم کہ او خوانیسہ دم درینگاکہ تو او کتاب ءِ حاجرہ نا دوٹی تِسکہ و حاجرہ خوانیسہ ہڑتوما تے بنفیکہ۔ بابا جمال دین ءِ کل آن زیات روسی ناول آک دوست بسرہ و ہمو کڑد آ تا کڑمبی تیا ہناکہ. ولی خان تینا آختئ آن وخت کشاکہ و شار آن پین کتاب الککہ ایسکہ۔ اندن خواننگ نا جنون اودے جُوان پلویڑ کریسس۔ اونا زند ئٹی خواننگ و آسیاب نا زیبا غا توار آن بیدس پین ہِچ اَلو۔ ہندا دے تیٹی اودے جوفہ اس ہرفے، جوفہ دون کہ اودے آسیاب نا کوٹی نا پد آن کتابجاہ اس جوڑ کروئی ئس انتئے کہ دا کتاب آتے آسیاب ئٹ جاگہ الو، او گراک آتے رد تریسہ مچے زر بھاز الککہ۔
حاجرہ داسہ آسیاب نا کوٹی آ بتوکہ او خلک ئنا کالج آن دوانزدہ پاس کریسس و مُستی خواننگ برجاء تخاسس۔ ولے وخت ئس کہ کوٹی آ بسکہ گُڈا ولی خان تون توسکہ و جوان کتاب تا زی آ شرہ کریرا، داسا اوفتا سرحال ناول آن ود فلسفی، تاریخ و سیاست نا زی آ ئس۔ حاجرہ ولی خان نا کتاب آتون سنگتی خنیسہ اُست ئٹی بھاز گل مسکہ۔
وخت تدینگسہ ہراتم حاجرہ شار آن شانزدہ پاس کرے و پدا خلق آ بس و سکول ئٹ خوانفنگ ءِ بنا کرے، خلک ئٹی شانزدہمی پاس آ او اولی مسِڑ ئس ہندا بابَت ئٹ اوڑکن بھاز آ سانگیک بسرہ ولے او کس ءِ امنّا کتو۔ اونا لُمہ ءِ دا ہیت فریشان کنگ ئس۔ انتئے کہ او تینا لُمہ ءِ پاریسس کہ اگہ او برام کیک تو ولی خان تون کیک نہ تو تینا مچ زند ءِ چڑہ گدریفک۔ اونا لمہ ولی خان کہ کلہو اس گدریفے و ہراتم ولی خان خلق آ ہنا گڑا ولی خان نا مون آ دا ہیت ءِ تخا۔ ولی خان ہان کرے و اوفتا برام مس۔ برام نا اول دے تیٹ او ہڑتوماک خلق ئنا اُرا ٹی ئسر۔ ولی خان سوب تون آسیاب آ بسکہ او شام ئنا پدا خلق کن سر ہلیسہ شام ئنا زائفہ تون مسکہ۔ ولی خان ءِ مچ شام شوگیری ئٹ گدریفوئی ئس انتئے کہ اودے آسیاب نا توار آن بیدس تغ بتوکہ۔ او اومیت کریسہ اسہ دے حاجرہ ءِ پارے کہ دا اُرا ءِ یلہ کینہ و آسیاب ئٹ کانہ تو حاجرہ بھاز زو امنا مس و ہڑتوماک ایلو دے آسیاب ئٹ لڈار۔ گڈ الو ٹی ہڑتوماک خوش گل وبال ئسر کتاب خوانارہ و اوفتا زی آ شرہ کریرہ، ولے سوب تون حاجرہ ءِ سکول آ ہنوئی مسکہ ہرا داسہ اوڑکن میل اس مُر تماکہ۔ حاجرہ سوب ئنا سکول آ ہِناکہ و بیگہ نا بسکہ دا ہن بر آن اونا بدن ژند بند مسکہ ایلو ویل دا ئس کہ او دا آسیاب نا توار و اوڑان بش مروکا نت آتا دنز ئنا سوب آن بھاز بے جیرت ئس۔ بھاز تنک مرسہ حاجرہ اسہ دے اوغنگ ءِ بناء کرے و مُچ نن شوگیر کریسہ اوغا۔ ولی خان نا دلاسہ تِیان ہم اونا مغز ئٹ اسہ ہیت اس ہم تُولتو۔ او تینا پُتنک آتے تَفے و ولی خان ءِ دا ہیت ءِ پاریسہ کہ تانکہ نی دا آسیاب ءِ یلہ کپیسہ و خلق ئٹ بفیسہ کنے آ بفیس، و تینا اُرا کن سر ہلک۔
ولی خان منہ دے آسیاب ئٹ تیر کرے پدا تینا اُست آ خل ئس تخیسہ خلق آ ہِنا۔ ہڑتُماک اُراٹی ئسُر و ولی خان گُزرزان کہ پاٹ نا دکان اس ملا۔ ولے ولی خان شام ئنا تغ الو و مچ شام شوگیری ئٹ گدریفکہ۔ وا پدا دا کسہ غان گڈ اوفتا نیام ئٹ امو مست ئنا مہر سلیتویسس اوفک ہیت ہم بھاز کم کریرہ۔ ولی خان ءِ دا بے تُغی بتریکا گنوک کریسس۔ او منہ دے آن پد سوب ئنا آسیاب آ اننگ بناء کرے۔ او آسیاب ئٹ ہناکہ اسہ زبر ءُ گونی اس آسیاب ئٹ شاغاکہ و سیر تغ خاچہ کہ ولے دا ہیت ئنا درک ءِ تینا زئفہ ءِ مننگ کن التوکہ۔ اندن سال ئس گدرینگا، ہراتم ولی خان نا مار ودی مس گڑا ولی خان نا است جم مس کہ داسہ حاجرہ ءِ پدا آسیاب نا پاوہ۔ حاجرہ اودے اسہ آزات بندغ اس تکاسس۔ ولے ہراتم حاجرہ ءِ دا سما تما کہ ولی خان ءِ آسیاب نا توار آن بیدس تغ بفک تو آفت اس بش مس ۔ اوفک جتا مسُر ۔ حاجرہ تینا مار ءِ خوانیفے بھلن کرے و شار آ درے۔
داسہ ولی خان نا مار بھلو افسر اس ئس و تینا لُمہ نا کزیت آن پد باوہ ءِ شار ئٹ دننگ نا بھاز کوشست کرے ولے سرسہب متَو۔ اودے اونا لُمہ اونا باوہ نا بیوسی نا بارو ئٹ پاتویسس۔ چندی کوشست آتیان پد او داسہ تینا باوہ ءِ پاتوکہ و سال ئٹ ارا وار خلق آ بسکہ گڈا تینا باوہ نا آسیاب ئٹ چکر اس خلککہ۔
دا دور ئٹ لشی نا جاگہ ءِ داسہ ٹریکٹر الکسس و امو مہر مریبت سیوت آواری ایسر مسوس۔ اَشر نا رسم و رواج خلک ئٹی بھاز کم خنگاکہ ہر بندغ ءِ تینا الکسس و کس کس ئنا چکار ئٹی الوکہ۔ ولی خان نا مرک اموزدے لکھنگا ہراتم آسیاب نا جاگہ ءِ چکی ہلک۔ ہرا کاریم آسیاب ئٹ مسہ دے ٹی مسکہ داسہ امو کاریم بجلی ئٹ چلینگوکا چکی ٹی مُسہ گھنٹہ ٹی مسکہ۔ مخلوق تینا غلہ آتے آسیاب نا جاگہ غا چکی ٹی دریرہ۔ ولے داسہ ہم گڑاس بندغ تینا غلہ آتے آسیاب ئٹ ایسرہ کہ پیر انگا تے گمان مسکہ آسیاب نا نت ہنین مریک۔ وا پیر انگا ولی خان بروکا غلہ تیان تینا بے تغی ءِ پورو کریکہ۔
خلق ئٹ چکی داسکان بتوسس خلق ئنا مخلوق تینا غلہ تے ایلو خلق آتیا دریرہ و ہرا بندغ ایلو خلق آتیا دننگ کتوکہ گڑا او تینا غلہ آتے آسیاب ئٹ ایسکہ و ولی خان ءِ زند ئس بشخاکہ۔ ولے تدوکا چل و پنچ دے آن آسیاب ئٹ اسہ گونی اس ہم بتوسس۔ ہرا نا سوب دا ئس کہ ولی خان نا مار خلق ئنا مُلا ءِ چکی اس تسوسس و خلق ئنا کل بندغ آک تینا غلہ آتے خلق ئنا ملا ءِ تسرہ ۔ ولی خان نا مار خلق ئنا ملا ءِ چکی دا سوب آن تسوسس کہ نوا کنا باوہ تینا آسیاب ءِ یلہ کہ و کنتو شار آ برے۔ ولے اودے سما الو کہ او تینا باوہ نا مرک ءِ لکھفینے۔
ولی خان تینا آسیاب نا کوٹی ٹی تموک نیم زندہ بھیم و خلیس نا حالیت ٹی غل غل کروکا خنتتو امو بندغ نا گڑتی ٹی سوب ئنا گربام آن مست دا مچا کسہ ءِ ننا مونا تخک و ناول ایسر مریک۔
ناول ئٹ ساڑی بنجائی کڑدار ولی خان ءِ آدینک ئسے نا دروشم ئٹ، تینا تہزیب و رسم و رواج تا شیفی بُڑزی، اسہ پیڑی نا ایلو پیڑی اسکان نا سفر و پرخ، بندغ نا نفسیاتی و فکری ردوم ئٹ ماحول و حالیت نا کڑد و اونا گڑتی تے رنگ و دروشم ئس ایشان تننگانے۔ ولی خان نا زند ئٹ شکست و ڈکھ آک اونا نفسیات آ دک اس تسوسر۔ اونا آسیاب تون دا مہر، مہر آن زیات نفسیاتی ناجوڑی اس خنگک۔ اونا مچ زند آسیاب نا دارہ ایرہ ٹی گدرینگک۔ دا ناول ٹی ولی خان بیرہ اسہ اسیاب اس اف بلکہ اونا کڑد خلی آ زند و مشینی انقلاب نا نیام ئٹ دورباری و زمانہ ئسے۔ دا کتاب ءِ خواننگ آن پد خلقی آ زند، تہزیب نا ردوم، مشینی انقلاب تون اوار مرک ئنا خمب ئٹ بندغ ئسے نا آزموندہ غاک دو ٹی بریرہ۔
دا ناول ءِ گچین کننگ نا بھلا مسخت اونا مٹ و بدل ئس ہرا کہ کنے تینا کُنڈ آ چکا۔ ناول ءِ خواننگ نا وخت براہوی بولی نا اندونو لوز کنا مونا تما ہرافتے ایت تینا جاغہ آ نوشت آتیٹی ہم ای خنتوسٹ۔ یعنی ننا لوز آک وخت و باری تون گم مننگ ءُ۔ بایدے نن تینا لوز آتے نوشتہ کین اوفتے تینا ہڑدے ئی بولی ٹے پدا آوڑدہ کین۔ جہان ٹی چندی زبانک گم مننگو، و براہوی ہم ہمو زبان تیان اسٹ ئسے ہراٹی اگہ لوز تا پٹ و پول، نوشت و ہڑدئی آ بولی ٹی اوار مفس تو زبان نا دیک کم مرور۔ زبان اگہ گُم مس گڑا راج ءِ ہم تینتو گوہک۔ تانکہ نن زبان نا خواست ءِ پورو کپن نن تینا زبان ءِ گوہنہ و زبان نا گوہنگ تینا جند ئنا گوہنگ ءِ۔ زبان تینا راج آن خواست کیک کہ او خواننگے، نوشت مرے و بولی ئٹ پاننگے۔ تانکہ نن تینا زبان ء تینٹ خوانپن نوشت کپن و بولی ئٹ اتپن بدر ئس ننا زبان ءِ رکھنک کپک۔ براہوئی زبان ئٹ اینو ہم تینا کچ ئٹ نوشت مسنے، بائدے نن اوفتے خوانن پٹ و پول کین اوفتا زی آ شرہ کین و اوفتا زی آ نوشتہ کین و تینا زبان گشاد ایتن۔
__________________________
دا نبشتانک ئٹی درشان مروکا غٹ خیال و لیکہ آک نبشتہ کار نا جند ئنا ءُ۔ المی اف کہ بی ایس سی اسلام آباد اونا خیال و لیکہ نا منوک مرے۔