من پہ ھالتاکے ءِ گِرگ ءَ پاک نیوز اجنسی ءِ دُکّان ءَ شُت آں۔ منی چم انام رزا ءِ رجانک کُتگیں کتاب "چار راہ ءَ اوشتاتگیں جنین"ءَ کپتاَنت۔ پہ سر سری چمشانکے ءِ واستہ من کتاب ایر کُت ءُ چار اِت داں جمیل مِھراب ءَ نبشتہ کُتگ اَت "وھدے اے گِدار 1977 ءَ چاپ ءُشِنگ کنگ بوت گُڑا دراھیں عرب اِستانانی ایراداں سر کش اِت ءُ مصر ءِ تہ ءَ اے گِدار ءِ سر ءَ بندش جنگ بوت۔" انچوش کہ منی چم لبز'بندش' ءَ کپ اَنت گُڑا من ءَ یک مردے ءِ گْوَشتگیں گپّے یاد اَتک۔ مرد ءَ گُوشتگ اَت "بوان ھما کتاباں کہ آھانی سر ءَ بندش جنگ بوتگ، پہدربرگ ءَ باز رس ایت۔"
پدا من پہ کتاب ءِ زُورگ ءَ ھچ چَک ءُ پد نہ بوت آں۔
مرچی کتاب کہ سرجمی ءَ ونت گُڑا دل ءَ گْوَشت دو دانک نبشتہ بکن آں۔
راستیں ھبر وَ اِش اِنت کہ من بگندئِے رجانک ءِ بابت ءَ آ رنگ ءَ آژنا نَہ آں۔ بلے یک وانوکے ءِ بِستار ءَ اے گپّ ءَ گوْشت باں کہ انام رزا ءِرجانک ءِ وانگ ءَ من ءَ سک کم سما بوتگ کہ من رجانکے وانگ ءَ آں ءُ منی ھیال ءَ ھمے رجانکءِ سوبمَنْدی اِنت۔ کِسّہ ءِ روانی اَنچوش برجمدارگ بوتگ کہ وانوک کسّہ ءِ تہ ءَ ھچ گار نَہ بیت، آ گوں کسّہ گوں اِنت ءُ روگ ءَ اِنت۔
ھر کس ءَ یک کسھے گوں۔ ھرکس وت یک کسّہ ئِے لھتیں کسّہ نبشتہ کنگ بَنت، ایر بَنتءُ لھتیں پش کپ اَنت، دزگرگ نَہ بنت، گوشدارگنَہ بنت ءُ پدا گوں کارستاں کَل بنت۔ گار بَنت۔ نبشتہ کار سکّیں شوکیں انسان اَنت ءُ من ءَ نبشتہ کار ھمے واستہ دوست بَنت کہ آ ھمےکسّھاں چِن اَنت ءُ یکجاہ کن اَنت۔ کسھاں گار بوئگ ءَ نئیل اَنت۔
ڈاکٹر نوال السعدوی چہ ھمے شوکیں انساناں یکّے۔ آ مصری چاگِرد ءِ کپتگیں کسّھاں فکشن ءِ رنگ ءَچِنت ءُ ایر کنت۔ 'چار راہ ءَاوشتاتگیں جنین' نوال السعدوی ءِ چتگ ءُ نزآؤرتگیں کسّھاں چَہ یکّے۔ اے کسّہ یک فردوس نامیں جنینے ءِ کسّہ اِنت کہ آ مصر ءِ قتاطیرزندان ءَ نوال السعدوی ءِ دیم ءَ یک تھاریں کوٹی ئِےءَ نشتگ ءُ وتی کسّہ ءَ آرگ ءَ اِنت۔
فردوس مردین آدمانی چاگرد ءَ، مردین آدمانی پادانی چیر ءَ رُد ایت ءُ مزن بیت۔ ءُ آئی ءَ چہ گوانزگ ءَ ھمے ھیال مانچینگ بیت کہ آ نزوراِنت، ھچ کُت نَہ کنت، ءُ بے مردین ءَ زندگ بوت نَہ کنت۔ اے زور مانچیتگیں ھیال، فردوس ءِ بیسہ ءِ مزنیں بھرے جوڑ بیت بلے وھدے فردوساولی رند ءَ یک مردیں آدمےءَ تیلانک دنت، آئی ءِ سر ءَ کارچ کش ایت ءُ آئی ءِ گردن ءَ سند ایت گُڑا چہ ھمد ءَ آئی ءِ تُرس گار بیت ءُ آ وتءَ مُھکم لیک ایت۔
السعدوی ءَ وتی اے گِدار ءِ تہ ءَ جنینانی نفسْیات ءِ اکس کَشّی کُتگ۔ آ اے گپّ ءِ پَدّرائی ءَ کنت کہ مردین آدم ھر چاگرد ءِ واجہ اِنت ءُجنیں گُلام۔مردین وتی واجھی ءِ برجم دارگ ءِ ھاتر ءَ مُدام جنین ءَ پادانی چیر ءَ کنت۔ ءُ چہ کسانی ءَ آئی ءِ مجگ ءَ اے گپّ ءَ مانچِنت کہتو کستر ءُ من مَستر، تو نزور ءُ من مُھکم۔ اوشو وتی کتاب 'عورت' ءِ تہ ءَ ھم ھمے گپ ءَ کنت کہ جنین ءَ بگند کہ ھروھد ءَ چو مردین ءَبوھگ لوٹ ایت۔ اشی ءَ پُشت ءَ سبب درست ھمے نفسْیات اِنت کہ مردین ءَ جنین ءِ مجگ ءَ مان کُتگ ءُ جنین نفسْیاتی رنگ ءَ مردین ءِ گُلامجوڑ بوتگ۔
ڈاکٹر نوال ءِ اے گدار پہ جنیناں یک دلبڈّی ءُ سکینے۔ نوال جنیناں سِکین دنت کہ چہ اے مردین آدمانی پَچیں دام ءَ، بزاں نفسْیات ءَ وتارارکّین اِت۔ آ ھمے گوشگ ءِ جُھد ءَ اِنت کہ تُرس ءَ جنینانی زندگی گران کُتگ۔ ھمے تُرس کہ مردیناں جنینانی دل ءَ داتگ۔ زندگی ھما وھد ءَوشّ ءُ سبک بیت وھدے جنین تُرس ءَ کُش اَنت ءُ وتارا چہ ھمے تُرس ءَ آجو کن اَنت۔ چوشکہ کہ گِدار ءِ 154 تاک ءَ فردوس گوش ایت " نوںمنی دل ءِ تہ ءَ یک جُستے پاد اَتک کہ چِد ءُ پیش من پرچا کدی مردینے ءِ سر ءَ دست چِست کنگ ءِ کوشست نَہ کُتگ۔۔ ءُ من اشی ءِ سوبھم پھم اِت کہ من ءَ چہ کسانی ءَ ترسینگ بوتگ اَت ھمے واستا ھمے تُرس سرجمیں اُمر ءَ منی ھمراہ اَت ءُ منی سساءِ یک دائمی بھرےجوڑ بوتگ اَت۔"
فردوس جانی ءَ کارچے جنت ءُ کوش ایت ءُ وھدے چہ پدیانکاں جھل ایر کپ ایت ءُ رھادگ بیت گُڑا چوش گوش ایت۔ "من انچو سُبک اِتآں گوش ۓ زاناں مرگی بانزلے اِتاں۔ من ءَ انچو سما بوت گوش ۓ زاناں منی جان ءِ ھچ وزن پش نَہ کپتگ۔ بس اے سالانی سال مُچ بوتگیںمنی تُرس ءِ گرانی اَت ءُ من چرائی ءِ بار ءِ چیر ءَ چہ ھچ سُر اِت نَہ کُتگ اَت۔"
فردوس یک کھبگیں جنین یے۔ چاگرد ءِ مردین آدمانی چمّاں آ یک بےشْرَپ ءُ بےگیرتیں جنینے۔ ھمے مردین کہ کھبگیں فردوس ءِ کر ءَ وتیتُن ءِ آس ءِ توسینگ ءَ رونت، ھمے ھم فردوس ءَ کم شْرَپ ءُ بےگیرت گوش اَنت۔ بلے اے گپّ ءَ بے ھال بنت کہ اے بےشْرَپی ءُ بےگیرتی ءَفردوس تھنا نَہ اِنت۔ اگاں فردوس چیر ءَ اِنت گُڑا آ سر ءَ اِنت۔
بلے گیشتریں چاگرداں ھمے پیم اِنت۔ مردیں میر ءِ کُرّیں شَنِک اِنت کہ ھچ کِچّ ۓ پِر نیست۔ آ ھرچی بکنت، آئی ءَ کس ھچ نَہ گُوش ایت۔
گدار ءِ تہ ءَ وھدے فردوس جانی ءَ کُش ایت گُڑا آ گرگ ءُ بند کنگ بیت۔ بندیگ جاہ ءَ آ گوں ڈاکٹر نوال ءَ چوش گوش ایت۔ "من ءَ انچیںکوٹی یے تہ ءَ بند کنگ بوتگ کہ آئی ءِ دروازگ مُدام بند اَنت۔ من اے گپّ ءَ شرّی ءِ سرا زاناں کہ آوانءَ چہ من تُرس اِتگ ئِے ۔ پرچا کہ منیکیں جنینے اِتاں کہ وتی نکاب لگوشتگ اَت ءُ آیانی سِلّیں دیم برھنگ کُتگ اِت آں۔ ءُ ھمے وڑا درست ھوار بوت اَنت ءُ پہ من پاھو ءِ لوپاِش گچین کُت۔ پرے واستہ انّا کہ من یک مردمے کُشتگ، بلکیں پرے واستہ کہ من داں زندگاں آ چہ من تُرس اَنت۔"
مردین واجہ اِنت۔ ءُ واجہ اے گپّ ءَ چون سگّ اِت کنت کہ آئی ءِ گُلام پاد بئیت ءُ آئی ءَ ھراب بگوش ایت۔
دیمتر ءَ ڈاکٹر نوال درائیں جنیناں بھا بدن گوش ایت۔ ءُ آ اے ھم گوش ایت کہ سکیں کم نھاد ءَ بھا بوؤکیں جنین سور کُتگیں جنین اَنت۔ آاے واستہ کہ پہ شپ ءِ شام ءُ روچ ءِ سُبارگ ءَ جنین وتی پورائیں بدن ءَ بر اَنت ءُ مردین ءِ دست ءَ دے انت۔ ءُ پدا مردین گوں آ بدن ءَ ھرچیزکُت کنت، لگت، مُشت، شھمات ءُ ھرابکاری۔
اے راستیں ھبرے کہ پہ زندگی ءِ روچانی تیلانک دیگ ءَ مردین ءَ جنین ءِ ءُ جنین ءَ مردینے درکار اِنت۔ نا ایوک ءَ جنین بوت کنت ءُ نئیکہمردین۔ پہ اے زند ءِ گوازینگ ءَ دوئیناں ھمدست ءُ ھمکوپگ بوئگ لوٹ ایت۔
سور ءِ بزانت وتارا بھا کنگ نَہ اِنت۔ بلکیں زندگی ءِ گرانیں بار ءَ دو کوپگاں کنگ اِنت۔ ھاں! جنین وتئ ھکّ ءِ گپّ ءَ کُت کنت بلے چہمردین ءَ سِدگ ءُ ایوک بوھگ! نبوتگیں گپّے۔ ھیر! ھرکسی وتی ھیال ءُ لیکھے۔۔
منی ھیال ءُ لیکھانی سر ءَ ھرکس 'ھو' ءُ 'انا' کت کنت۔ پمے واستہ من گوش آں کہ ھرکس وت اے کتاب ءَ بوان ایت ءُ گدار ءَ گوں وتیچمّاں بچار ایت۔