البرٹ کامیو ءِ آزمانک "مہمان" چمشانک: عزمت عزیز

 البرٹ کامیو ءِ آزمانک مہمان

آزمانک:
آزمانک  ءِتہ ءَدارو  (دارو دربرجاہ ءَ یک ماشٹرے) دو مردم گند ایت  دیم پہ  دربرجاہ ءَ پیداک اَنت۔ وہدے آ سر بنت تہ بلڈوسی  (بلڈوسی فرانس ءِ استانی مردم اِنت) یک عرب بندیگ اِنت۔ آ  وتی ناکو زھگ   ءَ کُشیت ءُپہ زور دارو ءِ دست ءَ دنت ءُ گُش ایت اِش، "ایشی ءَ بر ءُ پولیس ءِ دست ءَ بدئے۔" دارو عرب ءَ بارت  دو کِشک سوج دنت ۔ یکے دیم پہ بندیگ جاہ ءَ روت ءُ دومی شُوانگانی ھلک ءَ کہ  اودءَ عرب ءَ آ چیر دات کُت کن انت ،بلے عرب روت بندیگ جاہ ءَ ءُ  دانکہ دارو  دربرجاہ ءَ واتر بیت تہ بورڈ ءِ سرءَ نبشتہ اِنت کہ:”

“You handed over our brother. You will pay for this.”
(تو مئے برات  (دژمن ءِ) دستءَ داتگ، تو ھم بے مز نہ بئے۔ )
کارست:
 آزمانک ءِ کارست چار (4) اَنت:
1.بلڈوسی: یک استانی کارندگے۔
2.دارو: اسکول ماشٹرے ءُ فرانس ءُ الجیریاءِ جنگءِ نیام ءَ جُھد ءَ اِنت۔
3.بندیگ: الجیریا ءِ عربے کہ وتی ناکو زھگ ئِے پہ چُنڈے نان ءَ کُشتگ۔
4. بے نام: الجیریا ءِ ہما عرب انت کہ دربرجاہ ءِ بورڈ ءِ سرءَ نویس اَنت۔
اے ھمے مردم انت کہ فرانس ءِ ھلاپ ءَ جنگ ءَ انت۔ 
وھد ءُ جاہ (Setting):
اے آزمانک 1957 ءَ شِنگ بوتگ۔ اے ھما وھد  بیت کہ الجیریا   ءَفرانس ءِ ھلاپ ءَ آجوئی ءِ جنگ  جُنزگ ءَ بیت۔ آزمانک یک  دربرجاہے ءَ بِندات بیت کہ دور  یک کُنڈے ءَ کوہ دیمے  ءَ اِنت ءُ ایشی ءِ زِرباری نیمگ ءَ ریگزارے۔ اے جاہ ءِ اکس کشی ءَ نبشتہ کار انچیں دروشمے  ءَ کنت کہ ھمُک  وانوک ءَ سما کپ ایت کہ اے  دگ الجیریا اِنت۔ آ درشان کنت کہ اودءِ مردم  ھمینکدر  تنگ دست اَنت کہ چہ فرانس ءَ ٹرک کاینت پدا دربرجاہءِ ماشٹر "دارو "ایشاں نودربرانی سرءَ بھر ءُ بانگ کنت۔ بزاں اودءِ مردُم فرانس ءِ گُلام جوڑ کنگ بوتگ اَنت۔  

پلاٹ:
آزمانک ءِ پلاٹ سک جوان  انت انچو کہ راجمان نوآبادیاتی  اِنت،   کارست ھم ھما کارست اَنت کہ نوآبادیاتی راجمانے ءَ گوں ھوار بنت انچو کہ کسے زوراکی کنگ ءَ اِنت، کسے گہگیری  کنگ   ءَ اِنت ءُ کسے نیام ءَ وت ءَ  بے پلّو (Neutral) دارگ ءِ جھد ءَ اِنت۔ ھمے ڈول ءَ کارستانی تب ھم ھما نوآبادیاتی راجمان ءِ وڑءَ جوڑ کَنگ بوتگ اَنت۔  بلڈوسی کہ زورآور اِنت وتی کار ءَ پہ زوراکی کَشّ ایت انچو کہ عرب بندیگ ءَ  دارو ءِ دست ءَ دنت کہ پولیس ءَ سر ئِے بہ کنت۔ وھدے دارو رازیگ نہ بیت تہ دارو ءِ سرءَ زور کنت  ءُ بندیگ ءَ پولیس ءِ دستءَ دیائین ایت۔ دارو ءِ تب ھما نوآبادیاتی راجمان ءِ جھمنندانی تبءَ گوں ھمگونگ انت کہ آ وت ءَ  بے پلّو دارگ ءِ جُھد ءَ اِنت آ ھمے جُھد ءَ اِنت ۔ (بزاں بلڈوسی چہ من ناوش مہ بیت ءُ عرب ھم بندیگ جاہ ءَ چہ بِہ رَکّ ایت)۔ بندیگیں عرب ءِ ھما تب اِنت کہ فرانز فیننءَ وتی کتاب"The Wretched Of The Earth"ءِ تہءَ درشان کتگ۔ فینن ءِ گُشگ اِنت کہ زورگیر مدام  گُلامیں   ءُ لس مھلوک ءِ تہءَ یکے دومی ءِ گوما دیم پہ دیمی  جاورھال پیداک کنت۔   پہ درور ہمنچو گندیم کار ایت ءُ بھر کنت  کَسے ءَ  رس ایت ءُ کَسے ءَ نہ رس ایت۔ آسر چُوش بیت کہ مردم یکے دومی ءَ گوں جنگ  بندات کن انت ءُ کُشت ءُ کشار ءَ سر بنت۔ اِےآزمانک ءِ تہ ءَ انچوش اِنت کہ عرب ءَ وتی ناکوزتک پہ چُنڈے نان ءَ کُشت۔ اِدءَ وانوک ءَ  تچک ءَ تچک ھما نوآبادیاتی تب گندگ ءَ کیت۔ انچوش کہ نوآبادیاتی راجمانانی تہ ءَ یاگیانی بوگ یک ابرمی شئے  یے، ھمے وڑ اے کسہ ھم چہ یاگیاں  زبہر نہ انت۔ 

درشانداب:
من ءَ درشانداب ءِ تہ ءَ  جوانتریں  شئے کہ دوست بوت آ گلامیں راجمان ءِ پیش دارگ اَت کہ کامیو ءَ منی نزّ ءَ بے دروریں دروشمے ءَ پیش داشتگ۔  ھما جاگہ (الجیریا) ءَ کہ آزمانک نبشتہ کنگ بوتگ آ فرانس ءِ ایردست اِنت۔ آزمانک ءِ توک ءَ دارو چار ایت دیم پہ  دربرجاہءَ دو مردم پیداک کہ یکے اپس ءَ سوار اِنت ءُ دومی ءِ اپس ءِ پُشت ءَ دست بستگ اَنت۔ دارو کہ پہ کوٹ ءِ گورءَ کنگ ءَ  دربرجاہءِ تبک (کلاس) ءَ کہ پُتر ایت تہ چار ایت اودءَ بورڈ ءِ سرءَ فرانس ءِ چار کئورانی نکشہ جوڑ اِنت۔ اِدءَ چہ وانوکاں ھمے سما بیت کہ اے  دربرجاہ ءِ تبک ءِ بورڈانی سرءَ کہ دَری ڈیھ یےءِ کئورانی نکشہ جوڈ انت، اے جاگہ ھما ڈیھ ءِ ایردست بیت۔ پرچہ کہ مُدامی کہ  یک استانے کہ دومی ڈیھ ءَ ایردست  کنت تہ آ ڈیھ ءِ جِند ءِ بارو ءَ نہ وانین ایت بلکیں آھاں وتی(زورگیر ءِ) ڈیھ ءِ بارو ءَوانین ایت دانکہ آ(گُلامیں راج) وتی جند ءَ سرپد مہ بنت ءُ گہگیری مہ کن اَنت۔
ادءَ من ءَ وتی  دربرجاہ ءِ یات اتک کہ مُدامی مئے تبکانی بورڈانی سرءَ انڈس، جہلم ءُ راوی ءِ نکشہ جوڈ اِت انت بلے من داں کیچ ءَ نیاتکاں تہ نہ زانت کہ مارا کیچ  کئورے است۔ نبشتہ کار ءَ  دربرجاہ یک کِرءُ دوریں جاہے ءَ  ھمے واستہ ایر کُتگ کہ آ پیشدارگ لوٹ ایت کہ دارو (کہ ہمے   دربرجاہءَ  ماشٹر انت) فرانس ءُ الجیریا ءِ جنگ ءِ نیام ءَ  بے پلّو بوگ ءِ جھد ءَ اِنت۔ 

ھیال:
1. دارو کہ دربرجاہ ماشٹر اِنت فرانس ءُ الجیریا ءِ جنگ ءِ میان ءَ وت ءَ نیام ءَ دارگ ءِ جُھد ءَ اِنت۔ بلے اے رنگ ءِ جاورہالانی تہءَ نیام ءَ بوگ نہ بوتگیں ھبرے، کَسے کہ اے رنگیں جاورہالانی تہءَ زِندگ اِنت گڑا آ الم سان زور ایت۔ انچو کہ آزمانک ءِ تہءَ عرب بندیگ دارو ءِ دست ءَ دیگ بیت ءُ آئی ءَ چہ فرانس ءِ واکدارانی (بلڈوسی)  نیمگ ءَ گُشگ بیت کہ آ پولیس ءَ سر کنگ بہ بیت بلے دارو آئی ءَ بارت جاہے ءَ ءُ دو کِشکے سوج دنت کہ یکے دیم پہ پولیس ءِ کارگس ءَ روت ءُ دومی شُوانگانی ہلک ءَ کہ اودءَ عرب رَک اِت کنت۔ واتری ءَ کہ آ اسکول ءَ سر بیت داں بورڈ ءِ سرءَ بیھارے نبشتہ اِنت۔ 
            "You handed over our brother. You will pay for this."
(تو مئے برات(دشمن ءِ) دست ءَ داتگ،تو ھم بے مز نہ بئے۔)

بزاں کہ تو مئے برات پولیس ءَ داتگ، ترا ایشی ءِ بیر گِرگ بیت۔ چونائیءَ الجیریا ءِ آزاتی ءِ جنگ ءَ کامیو ءِ جِند وت ءَ نیام ءَ دار اِیت۔ اے ہمے نیام ءَ اوشتگ ءِ تجربگ اِنت کہ آزمانکی دروشم ءَ پیش دارگ بوگ ءَ اِنت۔

2. ھمے وہد ءَ کہ عرب بندیگ ءَ دوئیں کِشکانی زورگ ءِ موہ دیگ بیت گڑا آ تَچگ ءَ شُوانگانی کِرءَ چیر بوگ ءِ بَدل ءَ دیم پہ پولیس کارگس ءَ روت۔ اے کارست ءَ وتی ناکوزتک کُشتگ ءُ آ سِزا ءَ پمیشکہ منّ ایت دانکہ سِزا ءَ پد آ ساپ ءُ سلہ بہ بیت۔ کامیو ءِ اے کارست ءِ تہءَ ہم کامیو ءِ جِند گِندگ بیت انچو کہ کامیو مورل فلاسفرے (Moral Philosopher) ءُ عرب بندیگ ھم مورلاں منّ ایت ءُ سِزا ءَ زور ایت۔

3. وتی بھت ءِ وت واجہ بوھگ ھم اےآزمانک ءِ یک بُنجاہی ھیالے کہ مردُم ءَ زندگی ءَ باز رند ءَ وتی پیسلہ وت کنگی اَنت۔ زندگی مُدام  وتی بھت ءِ وتواجہیءُ تالہ ءِ نیام ءَ گردگ ءَ اِنت۔ ءُ گوں کسے ءَ زندگی ءَ ھرچ وئیل ءُ واکیہ یے بیت آ آئی ءِ تالہ ءُ پیسلہانی برورد اِنت۔ انچو کہ اگاں دارو ءَ بیھار دیگ بیت، اے دارو ءِ ھما پیسلہ ءِ برورد اِنت کہ وتی پیسلہ ئِے عرب ءِ دست ءَ داتگ ءُ عرب کہ بندیگ جاہ ءَ بند انت، اے ھم ھمائی ءِ جِند ءِ پیسلہ ءِ آسر اِنت۔ چوناھا دوئیناں گچین کنگ ءِ موہ رس ایت، دارو ءَ گچین کنگ ءِ موہ رس ایت کہ عرب ءَ یلہ بہ کنت ءُ عرب ءَ موہ رسیت کہ بہ روت شوانگانی ھلک ءَ وت ءَ بہ رَکینیت۔

                                                     

اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔